សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្ដ២គ្រឿងបើកបុកគ្នាត្រង់ផ្លូវបំបែកជាបួន បណ្ដាលឲ្យរថយន្ដម៉ាកប៉ាជេរ៉ូខ្ទាតទៅបុកបង្គោលភ្លើងខូចខាតមួយកំណាត់មុខ ហើយរថយន្ដបង្កបើករត់គេចខ្លួនបាត់ស្រមោល។
ហេតុការណ៍នេះកើតឡើងកាលពីវេលាម៉ោង១០យប់ ថ្ងៃទី២ ខែកញ្ញា ឆ្នាំ២០១៧ នៅត្រង់ចំណុចផ្លូវ១៩៩ កែងនឹង៣២៨ ក្នុងសង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ។
ម្ចាស់រថយន្ដបុកបង្គោលភ្លើងមានឈ្មោះ ប៉ោ បូរ៉ាវ៉ាត់ អាយុ៤០ឆ្នាំស្នាក់នៅជិតផ្សារពោធិ៍ចិនតុង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេបានឃើញរថយន្ដមួយគ្រឿងម៉ាក ប៉ាជេរ៉ូពណ៌ទឹកប្រាក់ពាក់ស្លាកលេខ 2W. 4671 ធ្វើដំណើរតាមបណ្ដោយផ្លូវ១៩៩ក្នុងទិសដៅពីជើងទៅត្បូងមកដល់ផ្លូវលេខ៣២៨ ស្រាប់តែមកដល់ចំណុចកើតហេតុខាងលើក៏មានរថយន្ដម៉ាកហាយឡេនឌ័រមិនចាំស្លាកលេខ បានបុកពីក្រោយរថយន្តប៉ាជេរ៉ូពេញមួយទំហឹងបណ្ដាលឲ្យរថយន្ដខ្ទាតទៅបុកបង្គោលភ្លើងរងការខូចខាតផ្នែកខាងមុខទៅមុខលែងរួច ដោយឡែករថយន្ដម៉ាកហាយឡេនឌ័រមិនចាំស្លាកលេខបានបើករត់គេចខ្លួនបាត់ស្រមោល ។
ក្រោយពេលកើតហេតុនគរបាលជំនាញចរចរាណ៍ផ្លូវគោកបានមកវាស់វែង និងអូសរថយន្ដទៅរក្សាទុកនៅចរចរាណ៍ផ្លូវគោករាជធានីភ្នំពេញ ដើម្បីដោះស្រាយ នៅពេលក្រោយ ដោយបង្គោលភ្លើងជាសម្បត្ដិរបស់រដ្ឋ ៕ ស រស្មី
