សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ស្ត្រីម្នាក់បានបាត់បង់ជីវិតយ៉ាងអាណោចអាធ័ម ខណៈស្ត្រីម្នាក់ទៀតរងរបួស ក្រោយហេតុការណ៍ធ្លាក់ពីលើគោយន្តកែច្នៃ។
សេចក្តីរាយការណ៍បានឲ្យដឹងថា ស្ត្រីម្នាក់បានស្លាប់នៅនឹងកន្លែង និងស្ត្រីម្នាក់ទៀតបានរងរបួស ក្នុងហេតុការណ៍ធ្លាក់ពីលើគោយន្តកែឆ្នៃដែលកំពុងបើកបរលើផ្លូវលំ ក្នុងភូមិអូត្រជាក់ចិត្ត ឃុំសំរុង ស្រុកព្រៃនប់ ខេត្តព្រះសីហនុ កាលពីវេលាម៉ោង៨និង២០នាទីព្រឹក ថ្ងៃទី៦ ខែកញ្ញា ឆ្នាំ២០១៧ ។
តាមប្រភពពីសមត្ថកិច្ចបានឲ្យដឹងថា មានគោយន្ដកន្ត្រៃ១គ្រឿង បើកបរដោយឈ្មោះ ម៉ាន់ ចិន ភេទប្រុស មុខរបរ ដុតធ្យូង មានទីលំនៅភូមិឫទ្ធីពីរ ឃុំកែវផុស ស្រុកស្ទឹងហាវ ខេត្តព្រះសីហនុ ដឹកអ្នកដំណើរ១០នាក់ ត្រឡប់មកពីវត្តអូរត្រជាក់ចិត្ត ឆ្ពោះទៅផ្ទះវិញ នៅភូមិឫទ្ធីពីរ លុះដល់ចំណុចខាងលើផ្លូវចុះចំណោត និង ផ្លូវរថភ្លើងឆ្លងកាត់ គោយន្ដ ក៏បានធ្លាក់ផ្លូវ បណ្ដាលឲ្យស្រ្តីអ្នករួមដំណើរ៣នាក់ ធ្លាក់ពីលើគោយន្ត ។
គ្រោះថ្នាក់នេះ បណ្ដាលឲ្យស្ត្រីម្នាក់ ឈ្មោះឌុល ចន អាយុ៥៤ឆ្នាំស្លាប់នៅនឹងកន្លែង និងស្ត្រីម្នាក់ទៀតឈ្មោះ អ៊ូ ស៊ីផា អាយុ ៥៥ឆ្នាំ រងរបួសមធ្យម អ្នកទាំងពីរ មានទីលំនៅភូមិឬទ្ធីពីរ ។ ចំណែកអ្នករួមតំណើរផ្សេងៗទៀតមិនរងរបួសឡើយ ។ ក្រោយកើតហេតុ អ្នកបើកគោយន្ដ គេចខ្លួនបាត់ ៕ ឆ្លាម សមុទ្រ
