សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ កម្លាំងកងរាជអាវុធហត្ថខណ្ឌទួលគោកខណៈជិះម៉ូតូល្បាតក្នុងភូមិសាស្រ្តរបស់ខ្លួន បានឃាត់ខ្លួនជនសង្ស័យ២នាក់ដកហូតកាំភ្លើងខ្លីមួយដើម និងថ្នាំញៀនជាច្រើនកញ្ចប់ កាលពីវេលាម៉ោង២កន្លះរសៀលថ្ងៃទី១៥ ខែកញ្ញា ឆ្នាំ២០១៧ ស្ថិតនៅចំណុចផ្ទះគ្មានលេខ ម្តុំរោងចក្រឆ្នាំង ភូមិ២៣ សង្កាត់បឹងកក់២ ខណ្ឌទួលគោក ។
ជនសង្ស័យដែលត្រូវឃាត់ខ្លួនមានឈ្មោះ ប្រាក់ វុទ្ធី ភេទប្រុស អាយុ២០ឆ្នាំ មុខរបរ មិនពិតប្រាកដ និងឈ្មោះ គឹម ឈុនលី អាយុ១១ឆ្នាំ មុខរបរ មិនពិតប្រាកដ អ្នកទាំងពីរស្នាក់នៅកន្លែងកើតហេតុខាងលើនិង ជាអ្នកជួញដូរថ្នាំញៀនដូចគ្នា ។
មន្ត្រីកងរាជអាវុធហត្ថខណ្ឌទួលគោកបានឲ្យដឹងថា មុនពេលកើតហេតុ កម្លាំងកងរាជអាវុធហត្ថខណ្ឌបានជិះម៉ូតូល្បាតនៅតាមបណ្តោយផ្លូវរថភ្លើង ម្តុំរោងចក្រឆ្នាំង សង្កាត់បឹងកក់២ ស្រាប់តែប្រទះឃើញក្មេងប្រុសម្នាក់នៅចំណុចខាងលើ។ ដោយមានការសង្ស័យជាសមាសភាពមិនល្អ ទើបកម្លាំងសមត្ថកិច្ចឃាត់ខ្លួនឆែកឆេរក្នុងខ្លួនស្រាប់តែ រកឃើញថ្នាំញៀនចំនួន២៣កញ្ចប់តូច រួចនាំក្មេងនោះមកសាកសួរនៅមូលដ្ឋានកងរាជអាវុធហត្ថខណ្ឌទួលគោក ។ ក្រោយពីធ្វើការសាកសួរ ទើបកម្លាំងធ្វើការស្រាវជ្រាវរហូតឈានដល់ការចុះទៅឃាត់ខ្លួនជនសង្ស័យម្នាក់ទៀត នៅចំណុចផ្ទះគ្មានលេខ ម្តុំរោងចក្រឆ្នាំងដូចគ្នា និងដកហូតថ្នាំញៀនថ្នាំញៀន៦កញ្ចប់តូចទៀត។ បន្ទាប់មកក៏នាំជនសង្ស័យរូបនេះទៅឆែកឆេរនៅផ្ទះរបស់គេ ស្រាប់តែបានរកឃើញថ្នាំញៀនចំនួន២៣កញ្ចប់ ដោយក្នុងនោះមាន២កញ្ចប់ធំ និងឧបករណ៏ជក់ថ្នាំញៀនមួយចំនួន ព្រមទាំងកាំភ្លើងខ្លីមួយដើមម៉ាក កា៥៤ ទៀតផង។
បច្ចុប្បន្នជនសង្ស័យទាំងពីរនាក់ រួមនឹងវត្ថុតាងដែលរឹបអូសបាន ត្រូវកម្លាំងកងរាជអាវុធហត្ថខណ្ឌទួលគោកបញ្ជូនទៅបញ្ជាការដ្ឋានកងរាជអាវុធហត្ថរាជធានីដើម្បីកសាងសំណុំរឿងបញ្ជូនទៅសាលាដំបូងរាជធានីចាត់ការតាមច្បាប់ ៕ ប្រាថ្នា
