រថយន្តហាយឡេនឌឺរជាន់ហ្វ្រាំងមិនជាប់បុកអ្នកជិះម៉ូតូឆ្លងថ្នល់រួចរេចង្កូតធ្លាក់ទឹកប្រឡាយ

ខេត្តកំពង់ធំ ៖ បុរសម្នាក់ជិះម៉ូតូឆ្លងថ្នល់ទៅមើលម្តាយមិនបានប្រយ័ត្នត្រូវរថយន្ដបុក រួចជ្រុលចង្កូតចុះទឹកប្រឡាយ បង្កឲ្យមានការភ្ញាក់ផ្អើល កាលពីម៉ោង៨នឹង០០នាទីព្រឹកថ្ងៃទី២៩ខែកញ្ញាឆ្នាំ២០១៧តាមបណ្តោយផ្លូវជាតិលេខ០៦ ត្រង់ចំណុចទល់មុខមន្ទីពេទ្យបង្អែកបារាយណ៍ សន្ទុកស្ថិតនៅភូមិត្រពាំងស្វាយ ឃុំបល្ល័ង្គ ស្រុកបារាយណ៍ ខេត្តកំពង់ធំ។

ប្រភពពីសមត្ថកិច្ចបានឲ្យដឹងថា អ្នកជិះម៉ូតូឈ្មោះ កើត វីន ភេទប្រុស អាយុ៤៦ឆ្នាំ (រងរបួសស្រាល) បានបញ្ចូនទៅព្យាបាលមន្ទីរពេទ្យបង្អែកបារាយណ៍ សន្ទុក ដែលនៅក្បែរកន្លែងកើតហេតុតែម្ដង ។ ជនរងគ្រោះបើកបរម៉ូតូម៉ាកសង់c125 ពណ៌ខ្មៅសេរី ឆ្នាំ២០១៤ ចំណែកតៃកុងរថយន្តហើយ ឈ្មោះ លន ហួរ ភេទប្រុស អាយុ២៩ឆ្នាំ ទីលំនៅភូមិធន់មោង ឃុំកំពង់ថ្ម ស្រុកសន្ទុក ខេត្តកំពង់ធំ បើករថយន្តហាយឡេនឌឺរ ពណ៌ស្ករ ស្លាកលេខ កំពង់ធំ 2A7586 ជាអ្នករត់តាក់ស៊ី។

បើតាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញអ្នកជិះម៉ូតូឆ្លងថ្នល់បត់ចូលមន្ទីរពេទ្យ ហើយរញីរញ័រមិនមើលមុខក្រោយហើយគេឃើញរថយន្តហាយឡេនឌឺរបើកល្បឿនមធ្យមតែអកស៊័រជាន់ហ្វ្រាំងមិនជាប់ក៏ទៅបុកម៉ូតូដែលជិះឆ្លងថ្នល់បោកដួលលើលថ្នល់ហើយរថយន្តក៏ជ្រុលចង្កូតទៅធ្លាក់ទឹកប្រឡាយ តែអ្នកជិះនៅក្នុងរថយន្តមានគ្នា៦នាក់ពុំមានរងរបួសឡើយ។

ចំណែករថយន្ត និងម៉ូតូប៉ូលិសដឹកយកទៅរក្សាទុកនៅធិការដ្ឋាននគបាលស្រុកបារាយណ៍ដើម្បីដោះស្រាយគ្នាតាមក្រោយ៕ ប៊ុន​រិទ្ធី