អាវុធហត្ថក្រុងប៉ោយប៉ែតឃាត់ខ្លួនយុវតីម្នាក់ទើបអាយុ១៦ឆ្នាំ ជួញដូរគ្រឿងញៀន

ប៉ោយប៉ែត៖ យុវតីអាយុ១៦ឆ្នាំម្នាក់ជួញដូរគ្រឿងញៀន ត្រូវបានកម្លាំងអាវុធហត្ថក្រុងប៉ោយប៉ែតចាប់ខ្លួន កាលពីវេលាម៉ោង១២និង៣៥នាទី ថ្ងៃទី៣០ ខែកញ្ញា ឆ្នាំ២០១៧ នៅចំណុចដើមពោធិ៍ លាងរថយន្ត ស្ថិតក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

សមត្ថកិច្ចប្រាប់ថា ជនសង្ស័យមានឈ្មោះសៀង ស្រីណែត ភេទស្រី អាយុ១៦ឆ្នាំ រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត។

សមត្ថកិច្ចបន្តថា ក្រោយពីឃាត់ខ្លួនយុវតីខាងលើដកហូតវត្ថុតាងបានម៉ាទឹកកកពណ៌(ស)ថ្លាចំនួន១ថង់ បន្ទាប់មកបន្តវិធីឈានដល់ឆែកឆេរលំនៅឋានផ្ទះល្វែងដែលឋិតនៅសាមគ្គីមានជ័យ សង្កាត់ក្រុងខាងលើរកឃើញវត្ថុតាងគ្រឿងញៀនយ៉ាម៉ាអក្សរ(wy)ចំនួន(២០ថង់) ពណ៌ខៀវ ជញ្ជីងសម្រាប់ថ្លឹងមួយ។

យុវតីជួញដូរថ្នាំញៀនខាងលើក្រោយពីសាកសួររបស់កម្លាំងសមត្ថកិច្ទបានបញ្ជូនទៅទីបញ្ជាការអាវុធហត្ថដើម្បីសាកសួរនិងបន្តនីតិវិធីបញ្ជូនទៅតុលាការ៕ វណ្ណា