ចេញពីផឹកសុីនៅក្លឹបដេញវាយគ្នាត្រូវកម្លាំងសមត្ថកិច្ចដេញចាប់ឃាត់ខ្លួនយកមកសួរនាំ

ភ្នំពេញ៖ យុវជន៣នាក់ត្រូវបានកម្លាំងសមត្ថកិច្ចល្បាតខណ្ឌចំការមន ដេញតាមចាប់ឃាត់ខ្លួនបានក្រោយពីពួកគេចេញពីផឹកសុីនៅក្នុងក្លឹបហើយ បង្កហិង្សាដេញវាយគ្នាតាមផ្លូវយ៉ាងអនាធិបតេយ្យ។

ហេតុការណ៍នេះបានកើតឡើងកាលពីវេលាម៉ោង២រំលងអធ្រាត្រ ឈានចូលថ្ងៃទី២ ខែតុលា ឆ្នាំ២០១៧ នៅក្បែររង្វង់មូលផ្សារដើមថ្កូវ ស្ថិតនៅក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។

យុវជនទាំង៣នាក់នោះទី១៖ មានឈ្មោះ ឈឿន រ៉េតដារ៉ូ ភេទប្រុស អាយុ២៥ឆ្នាំ មុខរបរទិញអេតចាយ ស្នាក់នៅ សង្កាត់ បឹងកក់១ ខណ្ឌទួលគោក ទី២ ៖ សេងចាន់ ពិសី ភេទប្រុស អាយុ១៧ឆ្នាំមុខរបរ រើសអេតចាយ ស្នាក់មិននៅមិនពិតប្រាកដ ទី៣៖ គឹម ឌួ អាយុ១៧ឆ្នាំ មុខរបរ រើសអេតចាយ ស្នាក់នៅ មិនពិតប្រាកដ ។

សមត្ថកិច្ចបានឲ្យដឹងថា នៅវេលាកើតហេតុ ខណៈដែលកម្លាំងសមត្ថកិច្ចកំពុងតែល្បាត ក៏បានប្រទះឃើញយុវជន២ ក្រុម ជីះម៉ូតូ៣ទៅ៤គ្រឿងដេញវាយគ្នាតាមដងផ្លូវ ពេលឃើញដូច្នេះកម្លាំងសមត្ថកិច្ចបានដេញាតាមចាប់បានម៉ូតូ១គ្រឿងម៉ាកសង់ប៊ិចពណ៌ក្រហម ពាក់ស្លាកលេខ ភ្នំពេញ 1BN-3335 ជិះគ្នា៣នាក់ ខណៈពួកគេព្យាយាមជិះគេចពីសមត្ថកិច្ចហើយបានមកដួលត្រង់ចំណុចផ្លូវ៤៧៨កែង និងផ្លូវ១៣៥ សង្កាត់ទួលទំពួង១ ក៏ត្រូវសមត្ថកិច្ចចាប់បានតែម្ដង ។

ចំណែកយុវជនទាំង៣នាក់បានប្រាបឲ្យដឹងថា មុនពេលកើតហេតុពួកខ្លួនមានគ្នា៣នាក់បានមកចូលផឹកសុីនិងរាំលេង សប្បាយនៅក្នុងក្លឹប ផ្លូឡាញ រួចដល់ពេលពួកគេចេញស្រាប់តែជិះម៉ូតូមកដល់ជិតរង្វង់មូលផ្សារដើមថ្កូវ ក៏លេចមុខយុវជន ១ក្រុមជិះម៉ូតូ២គ្រឿងមករករឿងរួចបានបង្កជម្លោះ ទាំងពួកគេមិនដែលស្គាល់គ្នាផង ភ្លាមៗនោះក៏ត្រូវសមត្ថកិច្ចដេញចាប់បានតែម្ដង ។

ក្រោយពេលកើតហេតុ យុវជនទាំង៣នាក់ព្រមទាំងម៉ូតូត្រូវ បានកម្លាំងសមត្ថកិច្ចនាំយកមកសាកសួរនៅអធិការដ្ឋាននគរបាលខណ្ឌចំការមន៕ ភារ៉ា ដង្កោ