សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកឃឹម ប៉ុណ្ណ អនុប្រធានតុលាការកំពូល នៅព្រឹកថ្ងៃទី០៩ ខែតុលា នេះ ប្រកាសសាលដីកាតម្កល់ការសម្រេចរបស់តុលាការថ្នាក់ក្រោមទុកជាបានការដដែល ពោលគឺ អតីតឧត្ដមសេនីយ៍ឯក ឈឿន ចាន់ថន ត្រូវជាប់ពន្ធនាគារ១៦ឆ្នាំដដែល ។
សវនាការកន្លងទៅ អតីតឧត្ដមសេនីយ៍ឯកយោធា ឈឿន ចាន់ថន បដិសេធថា ពុំបានប្រព្រឹត្តបទល្មើសដូចការចោទប្រកាន់នោះទេ សូមឱ្យតុលាការកំពូលរកយុត្តិធម៌ផង ។
លោក ពុធ ធាវី មេធាវីការពារក្ដីជនជាប់ចោទ ថ្លែងថា ជនជាប់ចោទឈឿន ចាន់ថន ហៅម៉ៅ អាយុ៤១ឆ្នាំ ជាប់ចោទពីបទ”រំលោភលើទំនុកចិត្ត , បំផ្លិចបំផ្លាញដោយចេតនា , គៃបំបាត់ដោយទុច្ចរិត , លក់ដូរនិងចែកចាយអាវុធ , បំផ្លិចបំផ្លាញនូវសម្ភារៈយោធាសម្រាប់បម្រើការប្រយុទ្ធនិងខ្វះស្មារតីទទួលខុសត្រូវក្នុងការដឹកនាំគ្រប់គ្រងអង្គភាព”ប្រព្រឹត្តនៅរាជធានីភ្នំពេញ ក្នុងឆ្នាំ២០០៧ តាមមាត្រា៦០១ មាត្រា៤៤៧ មាត្រា៣៩២នៃក្រមព្រហ្មទណ្ឌ មាត្រា២០នៃច្បាប់ស្ដីពីការគ្រប់គ្រងអាវុធជាតិផ្ទុះនិងគ្រាប់រំសេវ និង មាត្រា៩នៃក្រឹត្យច្បាប់លេខ០៤ឆ្នាំ១៩៨១ ។
គួរបញ្ជាក់ថា អតីតឧត្តមសេនីយ៍ឯកឈឿន ចាន់ថន ហៅម៉ៅ មេបញ្ជាការកងអង្គរក្សសម្តេចអគ្គមហាធម្មពោធិសាលជា ស៊ីម បានត្រូវកម្លាំងកងរាជអាវុធហត្ថចាប់ខ្លួន កាលពីព្រឹកព្រលឹមថ្ងៃទី១៣ ខែសីហា ឆ្នាំ២០១១ រួមជាមួយអង្គរក្ស៣នាក់ផ្សេងទៀតនៅក្នុងភូមិគ្រឹះតម្លៃជិត១លានដុល្លារ លេខ៦៥ ផ្លូវលេខ៩៥ សង្កាត់បឹងកេងកងទី៣ ខណ្ឌចំការមន ។
ការចាប់ខ្លួនគួរឱ្យភ្ញាក់ផ្អើលនេះ គឺបន្ទាប់ពីមានព្រះរាជក្រឹត្យដកហូតឋានន្តរស័ក្តិ និងតួនាទីដែលឡាយព្រះហស្តេលខាដោយព្រះមហាក្សត្រកាលពីថ្ងៃទី១២ ខែសីហា ឆ្នាំ២០១១មានន័យថា ការចាប់ខ្លួននេះធ្វើបន្ទាន់តែម្តង។ ជាមួយគ្នានេះ ក៏មានអនុក្រឹត្យតែងតាំងលោកឧត្តមសេនីយ៍ឯកយឹម លាង ឱ្យទទួលតំណែងជាមេបញ្ជាការកងអង្គរក្សជំនួសវិញ៕ចេស្តា
