សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ យុវជនម្នាក់ក្នុងចំណោមបក្ខពួក៣នាក់ ត្រូវបានកម្លាំងនគរបាលប៉ុស្តិ៍ច្បារអំពៅទី២ ធ្វើការឃាត់ខ្លួនពីបទ ប៉ុនប៉ងលួចទ្រព្យសម្បត្តិ កាលពីវេលាម៉ោង០២រំលងអធ្រាត្រឈានចូល ថ្ងៃទី ១១ខែវិច្ឆិកា ឆ្នាំ២០១៧ នៅចំណុចផ្ទះលេខ៤៩ ផ្លូវ៣៦៩ ភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ។
ជនរងគ្រោះឈ្មោះ មាស ចន្ថា ភេទប្រុស អាយុ ៣៣ឆ្នាំ ជនជាតិខ្មែរ មុខរបរ លក់ដូរ ស្នាក់នៅផ្ទះកើតហេតុ។ជនសង្ស័យឃាត់ខ្លួនបានឈ្មោះប៉ោ ធារ៉ា ភេទប្រុស អាយុ១៩ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិកើតហេតុ។
ប្រភពព័ត៍មានពីមន្រ្តីនគរបាលមូលដ្ឋាន បានឲ្យដឹងថា មុនពេលកើតហេតុជនរងគ្រោះ និងក្រុមគ្រួសារសម្រាកក្នុងផ្ទះកើតហេតុ ពុំបានចាក់សោរទ្វារផ្ទះទេ រហូតដល់ម៉ោង០២និង០០នាទី ថ្ងៃទី ១១-១១-២០១៧ ស្រាប់តែមានជនសង្ស័យ ០៣នាក់ ឈ្មោះប៉ោ ធារ៉ា, ឈ្មោះភ័ស្ស និងឈ្មោះណាក់ បន្លំបើកទ្វារផ្ទះជនរងគ្រោះចូលទៅក្នុងប៉ុនប៉ងលួចទ្រព្យសម្បត្តិ ពេលនោះក៏ត្រូវបានជនរងគ្រោះ និងក្រុមគ្រួសារឃើញ នាំគ្នាចាប់បានជនសង្ស័យម្នាក់ឈ្មោះប៉ោ ធារ៉ា យកមកប្រគល់ឲ្យសមត្ថកិច្ច ចាត់ការតាមច្បាប់។ ចំណែកជនសង្ស័យ០២នាក់ទៀត ឈ្មោះ ភ័ស្ស និងឈ្មោះ ណាក់ រត់គេចខ្លួនបាត់។
បច្ចុប្បន្នជនសង្ស័យខាងលើនេះ ត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌព្រែកព្នៅ ដើម្បីបញ្ចូនទៅតុលាការចាត់ការតាមនីតិវិធី ៕ សណ្ដោស
