សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលខណ្ឌឫស្សីកែវ បានស្រាវជ្រាវ បង្ក្រាបករណីជួញដូរដោយខុសច្បាប់នូវសារធាតុញៀន ជាក់ស្ដែងឃាត់ខ្លួនមនុស្សប្រុសស្រី២នាក់រួមនិងគ្រឿងញៀនចំនួន១៣កញ្ចប់តូចធំ ។
ករណីបង្រ្កាបគ្រឿងញៀនខាងលើនេះ បានធ្វើឡើង កាលពីវេលាម៉ោង២រសៀលថ្ងៃទី១៩ ខែវិច្ឆិកា ឆ្នាំ២០១៧ ត្រង់ចំណុចផ្ទះគ្មានលេខ ផ្លូវបេតុង ក្រុម៧ ភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
មន្រ្តីនគរបាលខណ្ឌឫស្សីកែវ បានឲ្យដឹងថា ជនសង្ស័យ០២នាក់ឈ្មោះ ង្វៀង ធីទៀង ភេទស្រី អាយុ៤២ឆ្នាំ ជនជាតិវៀតណាម មានទីលំនៅស្នាក់នៅផ្ទះជួលគ្មានលេខ ក្រុម៧៧ ភូមិលូ សង្កាត់ស្វាយប៉ាក មុខរបរមិនពិត(ជួញដូរ) និងឈ្មោះ រឿង ខែមរ៉ា ភេទប្រុស អាយុ៣២ឆ្នាំ ជនជាតិខ្មែរ ស្នាក់នៅផ្ទះគ្មានលេខ ភូមិសំបូរ ឃំុសំបូរ ស្រុកបាធាយ ខេត្តកំពង់ចាម មុខរបលាងម៉ូតូ(ប្រើប្រាស់)។
សមត្ថកិច្ចដកហូតសម្ភារមាន៖ ក្រាមពណ៌សថ្លាចំនួន១៣កញ្ចប់ ក្នុងនោះមានកញ្ចប់ធំចំនួន០១, ថង់សម្រាប់ច្រកគ្រឿងញៀនមួយចំនួន និងឧបករណ៍ប្រើប្រាស់មួយចំនួន។
បច្ចុប្បន្នជនសង្ស័យប្រុសស្រីទាំង២នាក់នេះ សមត្ថកិច្ចកំពុងបន្តការស្រាវជ្រាវរកបក្ខពួក និងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញអនុវត្តតាមនីតិវិធី ៕ អរុណរះ
