សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ កម្លាំងជំនាញប្រតិបត្តិការបានចុះបង្ក្រាបនិងឃាត់ខ្លួនជនសង្ស័យម្នាក់ ករណីជួញដូរដោយខុសច្បាប់នូវសារធាតុញៀន នៅចំណុចដីឡូត៍ ស្ថិតក្នុងភូមិថ្មគោល ឃុំរអាង ស្រុកកំពង់សៀម ខេត្តកំពង់ចាម ដោយប្រេីវិធីវិធានញុះញង់ ។
ការចុះបង្ក្រាប និងឃាត់ជនសង្ស័យខាងលើធ្វើឡើងនៅថ្ងៃសៅរ៍ ៦រោច ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៩ ខែធ្នូ ឆ្នាំ២០១៧ វេលាម៉ោង ១៦និង៣០នាទី ។
នគរបាលស្រុកកំពង់សៀមបានឱ្យដឹងថា ជនសង្ស័យ ឈ្មោះ ប៉ាវ វ៉ាន់ភឿន ភេទប្រុស អាយុ ៤៧ឆ្នាំ រស់នៅភូមិបឹងកុកទី២ សង្កាត់បឹងកុក ក្រុងកំពង់ចាម ខេត្តកំពង់ចាម ។
បន្ទាប់ពីបង្ក្រាប និងឃាត់ខ្លួនជនសង្ស័យ កម្លាំងចាប់យកថ្នាំញៀន១កញ្ចប់ ដែលជាវត្ថុតាង និងប្រាក់ញុះញង់ចំនួន ៥ម៉ឺនរៀល ទូរសព្ទ័ដៃចំនួន០២គ្រឿង ម៉ូតូចំនួន ០១គ្រឿង និងបន្តធ្វើការឆែកឆេរនៅផ្ទះជនសង្ស័យនៅភូមិបឹងកុកទី២ សង្កាត់បឹងកុក ក្រុងកំពង់ចាម រកឃើញម្សៅក្រាមពណ៌សសង្ស័យជាថ្នាំញៀនចំនួន ២៤កញ្ចប់ (តូច ២៣កញ្ចប់ ធំ ១កញ្ចប់) ឧបករណ៍សេពមួយសម្រាប់ និងសម្ភារវេចខ្ចប់មួយចំនួន។
បច្ចុប្បន្នជនសង្ស័យនិងវត្ថុតាងខាងលើ កម្លាំងបានកសាងសណុំរឿងបញ្ជូនបន្តតាមនីតិវិធី ៕ វណ្ណៈ
