សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ ការបើកបរខ្វះការប្រុងប្រយ័ត្ន មិនត្រឹមបំផ្លាញទ្រព្យសម្បត្តិខ្លួន និង សាធារណៈនោះទេ ងាយនឹងអាចគ្រោះថ្នាក់ដល់អាយុជីវិតថែមទៀតផង ។ ជាក់ស្តែងបុរសម្នាក់បាន បើករថយន្តបុករះបង្កាន់ដៃស្ពាន បណ្តាលឲ្យខូចខាតប្រវែង១០ម៉ែត្រ កាលពីវេលាម៉ោង២ និង១៥នាទី រំលងអធ្រាត្រ ឈានចូលព្រហស្បតិ៍ ១១រោច ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៤ ខែធ្នូ ឆ្នាំ២០១៧ ស្ថិតនៅចំណុចស្ពាន ស្ថិតនៅភូមិ-ឃុំ ហាន់ជ័យ ស្រុកកំពង់សៀម ខេត្តកំពង់ចាម ។
មន្ត្រីនគរបាលក្រុងកំពង់សៀមបានឲ្យដឹងថា បុរសបើករថយន្តបង្កហេតុឈ្មោះឈីន សុខ ជា អាយុ២៩ឆ្នាំ ជនជាតិខ្មែរ និងមានទីលំនៅភូមិបែកអន្លូង ឃុំអារក្សត្នោត ស្រុកស្ទឹងត្រង់ បើករថយន្តម៉ាកស្ការិច ពណ៌ស គ្មានស្លាកលេខ ក្នុងទិសដៅពីជើងទៅត្បូង ក៏ជ្រុលចង្កូត ពន្លះបង្កាន់ដៃស្ពាន បណ្តាលរងការខូចខាតប្រវែង១០ម៉ែត្រ តែមិនបង្កគ្រោះថ្នាក់ដល់អាយុ ជីវិតនោះឡើយ ។
ក្រោយកើតហេតុ មធ្យោបាយធ្វើដំណើរបង្កហេតុ ត្រូវបានយកមករក្សាទុកនៅអធិកាដ្ឋាន នគរបាលស្រុកកំពង់សៀម ខេត្តកំពង់ចាម ដើម្បីតម្រូវឲ្យម្ចាស់ចូលខ្លួនដោះស្រាយចំពោះ ការខូចខាតបង្កាន់ដៃស្ពាន ៕ វណ្ណៈ
