សម្តេចតេជោ៖ នៅខាងមុខនេះ យើងនឹងបង្កើត “មូលនិធិគន្ឋបុប្ផាកម្ពុជា” ដើម្បីស្វែងរកមូលនិធិបន្ថែមជួយដល់មន្ទីរពេទ្យគន្ឋបុប្ផា

ភ្នំពេញ៖ សម្តេចតេជោហ៊ុន សែន នាយករដ្ឋមន្ត្រីនៃកម្ពុជា នៅលើបណ្តាញសង្គមហ្វេសប៊ុក ព្រឹកថ្ងៃព្រហស្បតិ៍ ២កើត ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១៨ ខែមករា ឆ្នាំ២០១៨បានមានប្រសាសន៍ថា នៅខាងមុខនេះ យើងនឹងបង្កើត “មូលនិធិគន្ឋបុប្ផាកម្ពុជា” ដើម្បីស្វែងរកមូលនិធិបន្ថែមជួយដល់មន្ទីរពេទ្យគន្ឋបុប្ផា ។

សម្តេចតេជោនាយករដ្ឋមន្ត្រីបញ្ជាក់ថាៈ «ថ្មីៗនេះយើងបានបង្កើត មូលនិធិស៊ីក្លូដើម្បីជួយលើកស្ទួយជីវិតនិងជីវភាពរស់នៅរបស់បងប្អូនអ្នកធាក់ស៊ីក្លូអោយកាន់តែប្រសើរឡើង ដោយមានការឧបត្ថម្ភថវិកាសម្រាប់បាយទឹកនិងថ្លៃស្នាក់នៅប្រចាំថ្ងៃ ព្រមទាំងសេវាថែទាំនិងព្យាបាលដោយឥតគិតថ្លៃទៀតផង។ នៅខាងមុខនេះ យើងនឹងបង្កើត “មូលនិធិគន្ឋបុប្ផាកម្ពុជា” ដើម្បីស្វែងរកមូលនិធិបន្ថែមជួយដល់មន្ទីរពេទ្យគន្ឋបុប្ផា។ មូលនិធិថ្មីនេះ គឺមិនមែនលុបបំបាត់មូលនិធិ លោក Beat Richner មុនទេ។

នៅថ្ងៃនេះ ខ្ញុំសប្បាយរីករាយយល់ព្រមធ្វើជាប្រធានកិត្តិយសនៃ “មូលនិធិទ្រទ្រង់មនុស្សចាស់” ដែលបានរៀបចំដោយក្រសួងសង្គមកិច្ច អតីតយុទ្ឋជន និងយុវនីតិសម្បទា ដើម្បីជួយទ្រទ្រង់ជីវភាពរស់នៅរបស់មនុស្សវ័យចាស់នៅក្នុងប្រទេសកម្ពុជា។

សូមអរគុណម្ចាស់មូលនិធិ ដៃគូអភិវឌ្ឍន៍ ក្រុមហ៊ុនឯកជន និងសប្បុរជនទាំងអស់ ដែលបានចូលរួមឧបត្ថម្ភវិភាគទានដើម្បីសង្គមជាតិយើងរីកចម្រើន»៕

រូបភាពៈ ហ្វេសប៊ុកសម្តេចតេជោ