សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ មានករណីគ្រោះថ្នាក់ចរាចរមួយគួរឲ្យរន្ធត់ បានបង្កឡើងដោយរថយន្តដឹកដីបើកកៀរ និងកិនលោកយាយម្នាក់ដែលកំពុងជិះកង់ក្នុងភូមិ ។ ហេតុការណ៍នេះបានកើតឡើងនៅវេលាម៉ោង ៩នឹង៣០នាទីព្រឹក ថ្ងៃព្រហស្បតិ៍ ២កើត ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១៨ ខែមករា ឆ្នាំ២០១៨ នៅចំណុចផ្លូវលំក្នុងភូមិចុងខ្ញូង ឃុំមហាខ្ញូង ស្រុកកោះសូទិន ខេត្តកំពង់ចាម។
យោងតាមសមត្ថកិច្ចមូលដ្នានបានប្រាប់ឲ្យដឹងថា លោកយាយរងគ្រោះមានឈ្មោះផាន់ ណុន អាយុ៧៦ឆ្នាំ រស់នៅភូមិចុងខ្ញូង ឃុំមហាខ្ញូង ស្រុកកោះសូទិន កំពុងជិះកង់ក្នុងភូមិស្រាប់មកដល់ចំនុចកន្លែងកើតហេតុ ដែលមុខផ្ទះគាត់ មានរថយន្តដឹកដីម៉ាក់ ហីយ៉ាន់ដាយ ពណ៍ស បើកបរដោយបុរសម្នាក់ឈ្មោះ អ៊ាង អាយុ១៧ឆ្នាំទីលំនៅបច្ចុប្បន្ននៅភូមិតាគ្រៀប ឃុំព្នៅ ស្រុកសុីធរកណ្តាល ខេត្តព្រៃវែង ដែលមានការបើកបរខ្វះប្រុងប្រយ័ត្នផង ពីទិសខាងត្បូងមកជើងបានកៀរកង់លោកយាយបណ្តាលឲ្យដួល និងកិនក្បាលលោកយាយបានស្លាប់ភ្លាមៗនៅនឹងកន្លែង។
ក្រោយពេលកើតហេតុ រថយន្តនិងជនបង្កសមត្ថកិច្ចឃាត់ខ្លួនភ្លាមៗ ដើម្បីសាកសួរនិងដោះស្រាយតាមនិតីវិធី ចំណែកឯសពជនរងគ្រោះសមត្ថកិច្ចបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ វណ្ណៈ
