សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីម្នាក់ ត្រូវកម្លាំងនគរបាលប៉ុស្តិ៍ស្រះចកធ្វើការស្រាវជ្រាវនឹងឃាត់ខ្លួន ខណៈដែលកំពុងជិះម៉ូតូមួយគ្រឿងលាក់ទុកគ្រឿងញៀនមួយកញ្ចប់ធំនៅក្រោមកែបម៉ូតូ កាលពីថ្ងៃអាទិត្យ ៥កើត ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២១ ខែមករា ឆ្នាំ២០១៨ នៅចំណុចផ្លូវរថភ្លើង ភូមិ៣ សង្កាត់ស្រះចក ខណ្ឌដូនពេញ ។
ជនសង្ស័យត្រូវឃាត់ខ្លួនមានឈ្មោះ ម៉ែន ចាន់ធឿន ភេទស្រី អាយុ២៧ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួល ផ្លូវ លេខ១០៩ សង្កាត់មនោរម្យ ខណ្ឌ ៧មករា រាជធានីភ្នំពេញ ត្រូវសមត្ថកិច្ចឃាត់ខ្លួន ពីបទ រក្សាទុកនូវសារធាតុញៀនដោយខុសច្បាប់ ។ វត្ថុតាងចាប់យកមាន៖ ក្រាមពណ៌សថ្លាសង្ស័យជាគ្រឿងញៀនចំនួន០១កញ្ចប់ធំ, ម៉ូតូ០១គ្រឿងម៉ាក Today ពណ៌សពាក់ស្លាកលេខភ្នំពេញ ១CJ.៥៨៩២, ប្រអប់ក្រដាស់ពណ៌សចំនួន០១ និងថង់យួរដៃពណ៌សចំនួន០១ ។
តាមប្រភពពីសមត្ថកិច្ច បានឲ្យដឹងថា មុនពេលឃាត់ខ្លួននារីសង្ស័យគឺកម្លាំងប៉ុស្តិ៍ស្រះចក បានជិះការពារសុវត្ថិភាពជូនប្រជាពលរដ្ឋក្នុងមូលដ្ឋាល លុះល្បាតមកដល់ចំណុចកើតហេតុ ក៏ប្រទះឃើញជនសង្ស័យខាងលើនេះ ជិះម៉ូតូម៉ាក់ធូដេរពណ៌សពាក់ស្លាកលេខ ភ្នំពេញ 1CJ-5892 ដោយសង្ស័យកម្លាំងល្បាតក៏បានហៅឃាត់សួរនាំនិងឆេកឆេរ រកឃើញគ្រឿងញៀនចំនួន១កញ្ចប់ធំ ដាក់ក្នុងប្រអប់មួយលាក់ក្រោមកែបម៉ូតូ ។
បច្ចុប្បន្នជនសង្ស័យនិងវត្ថុតាង កំពុងឃាត់ខ្លួនជាបណ្តោះអាសន្ននៅអធិការដ្ឋានខណ្ឌដូនពេញ ដើម្បីសាកសួរ និងកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់៕ ស តារា
