សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រជាពលរដ្ឋជាច្រើននាក់ បានស្វាគមន៍ជនសង្ស័យ២នាក់ ម្នាក់មួយដៃ មួយជើង ឡើងប៉ោងមុខមាត់ ទើបសមត្ថកិច្ចខណ្ឌចំការមន អន្តរាគមន៍ដឹកចេញពីកន្លែងកើតហេតុភ្លាមៗ បន្ទាប់ពីជនសង្ស័យទាំង២នាក់នោះធ្វើសកម្មភាពឆក់កាបូបនារីម្នាក់កំពុងតែដើរមិនបានសម្រេច។
ករណីខាងលើនេះបង្កឲ្យមានកាភ្ញាក់ផ្អើលនៅវេលាម៉ោង៦និង៣០នាទីយប់ ថ្ងៃសុក្រ ១០កើត ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៦ ខែមករា ឆ្នាំ២០១៨ នៅចំណុចមុខប៉ុស្តិ៍នគរបាលរដ្ឋបាលទួលទំពូងទី១ ក្នុងសង្កាត់ទួលទំពូងទី១ ខណ្ឌចំការមន រាជធានី ភ្នំពេញ។
សមត្ថកិច្ចបានឲ្យដឹងថា ជនសង្ស័យទី១ មានឈ្មោះ វុធ មករា អាយុ១៧ឆ្នាំ មុខរបរសិស្សសាលាវិទ្យាល័យសន្ធរមុខ រស់នៅម្តុំផ្សារសុវណ្ណា និងជនសង្ស័យទី២មានឈ្មោះ តុន ហាក់ស័ក្ខសិត អាយុ១៦ឆ្នាំ មុខរបរមិនពិតប្រាកដ រស់នៅខេត្តកំពុងស្ពឺ។
សាក្សីថា នារីម្នាក់ដើរស្ពាយការបូបនៅផ្លូវ១៦៣កែងនឹងផ្លូវ៤៣២ពីត្បូងទៅជើង ក៏លេចមុខជនសង្ស័យ២នាក់ ជិះម៉ូតូម៉ាកឌ្រីម ១២៥ សេរីឆ្នាំ២០១៨ ពណ៌ខ្មៅ ស្លាកលេខ ភ្នំពេញ 1GU.5553 មកពីក្រោយជិតនារីរងគ្រោះឆក់កាបូប តែនារី ម្ចាស់កាបូបទាញបានមកវិញ ស្រែកឆោឡោ ផ្អើលសមត្ថកិច្ចដេញចាប់ដល់ផ្លូវ៤៤០ទើបចាប់បានជនសង្ស័យ ហើយប្រជាពលរដ្ឋនាំគ្នាបញ្ចេញកំហឹងម្នាក់មួយដៃ មួយជើងទៅលើជនសង្ស័យ រងរបួសប៉ោងមុខ។
នារីម្ចាស់កាបូបដើរទៅផ្ទះបាត់ មិនបានដាក់ពាក្យបណ្តឹងឡើយ។
សមត្ថកិច្ចប៉ុស្តិ៍នគរបាលរដ្ឋបាលទួលទំពូងទី១បញ្ជូនជនសង្ស័យនិងម៉ូតូទៅអធិការដ្ឋាននគរបាលខណ្ឌចំការមន ចាត់ការតាមច្បាប់៕ ភារ៉ា ដង្កោ
