សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ផ្ទះមួយខ្នងសង់ពីស័ង្កសីត្រូវបានអគ្គិភ័យឆេះសល់តែគ្រោងឆ្អឹង ខណៈដែលម្ចាស់ដាក់ដាំបាយចោល ហើយដើរទៅលេងផ្ទះអ្នកជិតខាងបង្កការភ្ញាក់ផ្អើលដល់អ្នកជិតខាងជួយអន្តរាគមន៍បាញ់ពន្លត់ ប៉ុន្តែរមិនអាចគ្រប់គ្រងស្ថានកាណ៍បាននោះទេ បានត្រឹមម្ចាស់ផ្តះឈរសម្រក់ទឹកភ្នែកគួរឲ្យអាសូរ។
ហេតុករណ៍នេះបានកើតឡើងកាលពីវេលាម៉ោង៨ និង៣០នាទី យប់ថ្ងៃសៅរ៍ ៣រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៣ ខែកុម្ភៈ ឆ្នាំ២០១៨ ស្ថិតក្នុងភូមិថ្មី ឃុំសំបួរ ស្រុកស្វាយទាប ខេត្តស្វាយរៀងដោយមូលហេតុមកពីភ្លើងចង្ក្រានបាយ។
យោងតាមសមត្ថកិច្ចនគរបាលស្រុកស្វាយទាបបានឲ្យនគរវត្តដឹងថា ផ្ទះដែលរងការឆាបឆេះមានទំហំ៤ម៉ែត្រគុណនិង៦ម៉ែត្រធ្វើអំពីឈើប្រក់សង្ក័សី ដោយមានម្ចាស់ផ្ទះឈ្មោះ ប៉េ រតនា ភេទស្រី អាយុ៦៣ឆ្នាំ មុខរបរកសិករ។
តាមម្ចាស់ផ្ទះបានឲ្យដឹងថា ចំពោះសម្ភារដែលខូចខាតរួមមានប្រាក់ចំនួន ៥០ម៉ឺនរៀល មាសចំនួន ៥ហ៊ុន កង់ចំនួន០៣គ្រឿង និងសម្ភារប្រើប្រាស់មួយចំនួនទៀត។
ប្រភពបន្តថា មុនកើតហេតុគាត់បានដាំបាយដូចសព្វដងហើយ ក៏បានទៅលេងផ្ទះអ្នកជិតខាងឈ្មោះ បូរ៉ា ដែលនៅក្បែគ្នា ខណៈភ្លេចគិតថាខ្លួនកំពុងដាំបាយមួយស្របក់ក្រោយមកប្រមាណជាងកន្លះម៉ោងស្រាប់តែមានក្មេងរត់ទៅប្រាប់ថា ផ្ទះមីងមានភ្លើងឆេះនៅក្នុងពីផ្ទះបាយ ក៏បង្កការភ្ញាក់ផ្អើលនិងហៅអ្នកជិតខាងមកជួយពន្លត់ភ្លើងតែភ្លើងបានឆេះសន្ធោសន្ធៅ ពេញក្រមុំទៅហើយទោះបីអ្នកភូមិជួយពន្លត់យ៉ាងណាក៏ដោយ៕ យឹម សុថាន
