សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គ្រោះថ្នាក់ចរាចរណ៍ទូទាំងប្រទេសពេញ១ខែកុម្ភៈ ឆ្នាំ២០១៨ មានមនុស្សស្លាប់១៥៧នាក់ និងមនុស្ស ៤១២នាក់ទៀតរបួសធ្ងន់ស្រាល ។
បើយោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបញ្ជាក់ថា រយៈពេលពេញ ១ ខែ កុម្ភៈ ឆ្នាំ២០១៨ មានករណីគ្រោះថ្នាក់ចរាចរណ៍កើតឡើងចំនួន២៥៣លើក។
របាយការណ៍បានបញ្ជាក់ទៀតថា គ្រោះថ្នាក់ចរាចណ៍ទាំង២៥៣លើកនេះ បានបណ្ដាលឲ្យខូតខាតម៉ូតូចំនួន២៦៩គ្រឿង, រថយន្ដធុនតូចចំនួន១១២គ្រឿង, រថយន្ដធុនធំចំនួន៥៣គ្រឿង, យានផ្សេងៗ២៨គ្រឿង និងអ្នកថ្មើជើង៣០នាក់។
មូលហេតុដែលបណ្ដាលឲ្យមានករណីគ្រោះថ្នាក់ចរាចណ៍រួមមានល្មើសល្បឿនចំនួន៩៩លើក, ស្រវឹង២១លើក, ប្រជែងចំនួន៣១លើក, មិនប្រកាន់ស្ដាំចំនួន២១លើក, មិនគោរពសិទ្ធ៤៥លើក, បត់គ្រោះថ្នាក់ចំនួន១៨លើក, កត្តាយានយន្ដចំនួន១៦លើក និងងងុយដេកចំនួន២លើក។
របាយការណ៍បានបញ្ជាក់ទៀតថា ខេត្តក្រុងដែលមានករណីគ្រោះថ្នាក់ចរាចរណ៍ច្រើនជាងគេរួមមាន៖ រាជធានីភ្នំពេញ, ខេត្តកណ្ដាល, ខេត្តព្រះសីហនុ, ខេត្តសៀមរាប, ខេត្តព្រៃវែង, ខេត្តកំពង់ធំ, ខេត្តពោធិ៍សាត់, ខេត្តកំពង់ស្ពឺ, ខេត្តបន្ទាយមានជ័យ និងខេត្តកំពង់ឆ្នាំង៕ ឆ ដា
