នគរបាលប៉ុស្តិ៍ទឹកថ្លាឃាត់ខ្លួនជនសង្ស័យម្នាក់ ពីបទលួចម៉ូតូ

ភ្នំពេញ៖ កម្លាំងនគរបាលប៉ុស្តិ៍ទឹកថ្លា សហការជាមួយប្រជាពលរដ្ឋដែលជាម្ចាស់បើកកន្លែងទទួលផ្ញើរម៉ូតូ បានឃាត់ខ្លួនជនសង្ស័យម្នាក់ កាលពីវេលាម៉ោង៨ យប់ថ្ងៃព្រហស្បតិ៍ ១៥កេីត ខែផល្គុន ឆ្នាំរការ នព្វស័ក ពស២៥៦១ ត្រូវនឹងថ្ងៃទី១ ខែមីនា ឆ្នាំ២០១៨ នៅចំណុចផ្លូវបេតុង ក្រោយខារ៉ាអូខេញូវស្តា ស្ថិតនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ។

ជនរងគ្រោះ ឈ្មោះ ប៉ែន គង្គា ភេទប្រុស អាយុ២៧ ឆ្នាំ មុខរបរសន្តិសុខ ស្នាក់ក្រុម២ ភូមិ១ សង្កាត់ស្ទឹងមានជ័យ១ ខណ្ឌមានជ័យ ចំណែកជនសង្ស័យ ឈ្មោះ ឈុំ រស្មី អាយុ១៩ឆ្នាំ មុខរបរមិនពិតប្រាកដ ស្នាក់នៅក្បែរផ្ទះជនរងគ្រោះ

មន្រ្តីនគរបាលខណ្ឌសែនសុខ បានឲ្យដឹងថា មុនពេលឃាត់ខ្លួនជនសង្ស័យខាងលើនេះ គឺជនសង្ស័យបានធ្វើសកម្មភាពលួចម៉ូតូមួយគ្រឿង ម៉ាកហុងដាវេវ ពណ៌ខ្មៅ ពាក់ស្លាកលេខភ្នំពេញ1CV-1758 បានសម្រេចហើយក៏យកមកផ្ញើ នៅកន្លែងផ្ញើម៉ូតូ ចៃដន្យអីម្ចាស់ម៉ូតូបានឆែកតាម ប្រពន្ធ័GPS ក៏បានរកឃើញទីតាំងម៉ូតូខ្លួន ដែលបានបាត់កន្លងទៅ រួមយកកាតគ្រីម៉ូតូទៅឲ្យអ្នកផ្ញើម៉ូតូ ដោយប្រាប់ថា បើមានអ្នកផ្សេងមកយកម៉ូតូនេះ ជួយតេទូរសព្ទ័ប្រាប់គាត់ផង ព្រោះម៉ូតូខាងលើនេះ គាត់បានបាត់កាលពីយប់ថ្ងៃទី២៨ ខែកុម្ភ: ឆ្នាំ២០១៨ នៅចំណុចផ្លូវបេតុង ក្រុម២ភូមិ១ សង្កាត់ស្ទឹងមានជ័យ១ ខណ្ឌមានជ័យ ។

លុះដល់ម៉ោងកើតហេតុខាងលើ ជនសង្ស័យក៏ត្រលប់ ទៅយកម៉ូតូពីកន្លែងផ្ញើម៉ូតូនោះ ម្ចាស់កន្លែងផ្ញើម៉ូតូបានហៅសមត្ថកិច្ចនគរបាលប៉ុស្តិ៍ទឹកថ្លា ឃាត់ខ្លួនជនសង្ស័យ ប្រគល់ឲ្យនគរបាលប៉ុស្តិ៍ស្ទឹងមានជ័យ១វិញ ព្រោះជាម្ចាស់ករណីចាត់ការបន្តតាមនីតិវិធី ។

បច្ចុប្បន្នជនសង្ស័យខាងលើ ត្រូវបានឃុំខ្លួនបណ្តោះអាសន្ន នៅអធិការដ្ឋាននគរបាលខណ្ឌមានជ័យ និងកសាងសុំនុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមច្បាប់ ៕ ស តារា