សារព័ត៌មាន នគរវត្ត តែងតែនាំមុខគេជានិច្ច
ការផ្ទុះអាវុធ បានកើតឡើងជាបន្តបន្ទាប់នៅអាមេរិក ទាំងនៅតាមផ្លូវ នៅសាលារៀន បង្កឲ្យមានការបារម្ភយ៉ាងខ្លាំងពីពលរដ្ឋអាមេរិកទាំងមូល ពិសេសគឺ អាណាព្យាបាលសិស្សនៅតាមសាលារៀននានា ។
ប៉ុន្តែ នៅពេលនេះ មានការបាញ់ប្រហារនៅមុខសេតវិមានអាមេរិកតែម្តង ដែលជាសញ្ញាមិនល្អ ដល់រដ្ឋាភិបាលអាមេរិក ។ ពលរដ្ឋអាមេរិក ដែលប្រឆាំងនឹងការប្រើប្រាស់កាំភ្លើង បានលើកឡើងថា រដ្ឋាភិបាលគួរតែមានវិធានការទប់ស្កាត់ការប្រើប្រាស់កាំភ្លើងយ៉ាងអនាធិបតេ្តយ្យបែបនេះ។
សារព័ត៌មាន ស៊ីអិនអិន កាលពីថ្ងៃទី៤ ខែមីនា បានដកស្រង់សម្តីអ្នកនាំពាក្យក្រសួងចារកិច្ចអាមេរិកបានឲ្យដឹងថា មានបុរសម្នាក់បានដកកាំភ្លើង ដែលលាក់ទុកក្នុងខ្លួនចេញបាញ់ចំក្បាលខ្លួនឯងធ្វើអត្តឃាត នៅជាប់របងសេតវិមាន បង្កឲ្យមានការភ្ញាក់ផ្អើលយ៉ាងខ្លាំង ។
តាមការប្រកាសរបស់ក្រសួងចារកិច្ចអាមេរិក បានបញ្ជាក់ថា ក្រុមសន្តិសុខ បានទៅដល់កន្លែងកើតហេតុភ្លាមៗក្រោយឮស៊ូស្នូរកាំភ្លើង ដោយឃើញបុរសម្នាក់ស្លាប់នៅក្នុងថ្លុកឈាមជិតរបងសេតវិមាន ។ អ្នកនាំពាក្យក្រសួងចារកិច្ចបានបញ្ជាក់ថា បុរសខាងលើបានដើរចូលក្បែរ របងសេតវិមានរួចដកកាំភ្លើងចេញបាញ់ខ្លួនឯងតែម្តង ។ ការបាញ់នោះ មិនសម្តៅទៅលើសេតវិមាននោះឡើយ។ បុរសធ្វើអត្តឃាតខាងលើបានបាញ់ទៅលើទូរស័ព្ទដៃរបស់ខ្លួន មុនពេលធ្វើអត្តឃាត ។
ប៉ូលិសបានកំណត់អត្តសញ្ញាណ បុរសខាងលើ ប៉ុន្តែមិនបានប្រកាសឲ្យដឹងជាសាធារណៈនៅឡើយ មុនពេលផ្តល់ព័ត៌មាន ដល់គ្រួរសារ ។ នៅពេលបាញ់ប្រហារធ្វើអត្តឃាត មុខសេតវិមាន ពេលនោះ ប្រធានាធិបតីដូណាល់ ត្រាំ និងភរិយា កំពុងតែ ស្នាក់នៅរម្មណីយដ្ឋាន Mar A Lago រដ្ឋ ផ្ល័រីដា អាមេរិក ៕ ម៉ែវ សាធី
