រថយន្តកុងតឺន័រ២គ្រឿងបុកតកន្ទុយគ្នារងការខូចខាត

ភ្នំពេញ៖ ហេតុការណ៍គ្រោះថ្នាក់ចរាចរណ៍មួយរវាងរថយន្តដឹកកុងតឺន័រ២គ្រឿង បានបើកបុកតកន្ទុយគ្នាបណ្តាលឲ្យរងការខូចខាតយ៉ាងដំណំ ខណៈរថយន្តដែលបើកខាងមុខបានបត់ឆ្វេងដៃធ្វើឲ្យរថយន្តដែលបើកតាមពីក្រោយនោះវាក់ជាន់ហ្វ្រាំងមិនជាប់។

ឧប្បត្តិហេតុនេះបានកើតឡើងកាលពីវេលម៉ោង៣និង១០នាទីរសៀល ថ្ងៃសុក្រ ១១កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែឧសភា ឆ្នាំ២០១៨ នៅលើកំណាត់ផ្លូវអូរដឹមកប់ស្រូវ ត្រង់ចំណុចភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

តាមប្រភព័ត៌មានបានឲ្យដឹងថា នៅមុនពេលកើតហេតុរថយន្តទាំង២គ្រឿងបានបើកបរធ្វើដំណើរស្របទិសគ្នាក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុរថយន្តម៉ាកFREIGHTLANER ពណ៍ទឹកប៊ិច ពាក់ស្លាកលេខភ្នំពេញ3C-4469 ដែលបើកខាងមុខបានបត់ឆ្វេង ដែលជាហេតុធ្វើឲ្យរថយន្តហ៊ីណូ ពណ៌បៃតងពាក់ស្លាកលេខភ្នំពេញ3B-1765 ជាកម្មសិទ្ធិរបស់ក្រុមហ៊ុន ផែស្ងួតដែលកំពុងបើកប្រកៀកប្រកិតពីក្រោយវាក់គេចមិនទាន់បុកពីក្រោយពេញទំហឹងតែម្ដង ។

ក្រោយពេលកើតហេតុភាគីទាំង២បានសម្របសម្រួលគ្នាបញ្ចប់រឿងដោយគ្មានសំណងឡើយ គឺរថយន្តដែលខូចខាតដោយបុកគឺពីក្រោយត្រូវបានម្ចាស់យកទៅជួសជុលឡើងវិញដោយខ្លួនឯង ៕ សុខាសែនជ័យ