សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ មេល្បែង៥នាក់ ត្រូវបានចាប់ខ្លួនបញ្ជូនទៅតុលាការខេត្តកណ្ដាល ដើម្បីចាត់ការតាមច្បាប់ ។ ប៉ុន្តែក្រោយការសាកសួរ នៅល្ងាចថ្ងៃពុធ ១រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែឧសភា ឆ្នាំ២០១៨ មេល្បែង៤នាក់ ត្រូវបានបញ្ជូនទៅឃុំខ្លួនដាក់ពន្ធនាគារបណ្តោះអាសន្ន តែមេល្បែងម្នាក់ត្រូវបានលោកសាយ សម្ផស្សសេរី ចៅក្រមស៊ើបសួរសាលាដំបូងខេត្តកណ្ដាល សម្រេចមិនឃុំខ្លួន តែដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ។
មេល្បែងទាំង៤នាក់ ដែលជាប់ឃុំក្នុងពន្ធនាគារ ទី១ ឈ្មោះ ស៊ិន គុន ភេទប្រុស អាយុ៦៦ឆ្នាំ ទី២ ឈ្មោះ ប៊ាន សុខជា ភេទប្រុស ៥០ឆ្នាំ ទី៣ ឈ្មោះ ដង យ៉ាំងហ្វាង ភេទប្រុស អាយុ៤៩ឆ្នាំ និង ទី៤ ឈ្មោះ ឆាយ ហុក ភេទប្រុស អាយុ៤០ឆ្នាំ ។ មេល្បែងទាំង៤នាក់ ជាប់ចោទពីបទ”បើកល្បែងនិងលេងល្បែងស៊ីសងខុសច្បាប់”ប្រព្រឹត្តនៅចំណុចភូមិទួលដូង ឃុំគគីរ ស្រុកកៀនស្វាយ ខេត្តកណ្ដាល កាលពីថ្ងៃទី២៨ ខែឧសភា ឆ្នាំ២០១៨ តាមមាត្រា៤និងមាត្រា៥ច្បាប់ស្ដីពីការបង្ក្រាបល្បែងស៊ីសង។
ដោយឡើកមេល្បែងមានសំណាងនោះ មានឈ្មោះ ឆោម ឆៃយ៉ា ភេទប្រុស អាយុ៣៩ឆ្នាំ។
សូមរំលឹកថា ទីតាំងលេងល្បែងអាប៉ោងដ៍ធំនៅស្រុកកៀនស្វាយ សម្រាប់មេអាប៉ោងមកបាញ់ភ្នាល់ចំនួនបីខេត្ត គឺខេត្តព្រៃវែង ខេត្តត្បូងឃ្មុំ និងខេត្តកណ្តាល ត្រូវបានលោកវរសេនីយ៍ទោ ឡាក់ ម៉េងធី ប្រធានការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាលបានដឹកនាំកម្លាំង និងមានការសម្របសម្រួលពីសំណាក់លោក ឯក ស៑ុនរស្មី ព្រះរាជអាជ្ញាររងអមសាលាដំបូងខេត្តកណ្តាល បានចុះបង្ក្រាប និងបំបែកទីតាំង ហើយឃាត់ខ្លួន មេអាប៉ោង និងអ្នកភ្នាល់បាន០៦នាក់ លុយដុល្លារ ៨៧៥ដុល្លារ លុយខ្មែរ ៣.៧០០.០០០រៀល ឡាន០២គ្រឿង និងវត្ថុតាងមួយចំនួនទៀត។
ហេតុការណ៍ចុះបង្ក្រាបនេះថ្ងៃចន្ទ ទី២៨ ខែឧសភា ឆ្នាំ២០១៨វេលាម៉ោង១៣និង៣០នាទី នៅចំណុច ផ្ទះឈ្មោះ ប៉ែន ថុល (ម្ចាស់ផ្ទះ) ភូមិទួលដូង ឃ៊ំគគីរ ស្រុកកៀនស្វាយ ខេត្តកណ្ដាល។
វត្ថុតាងចាប់យក មេអាប៉ោង០៨ និង ប្រដាប់ខាតជើងអាប៉ោង ០១សន្លឹក គម្រប០១.កម្រាលអាប៉ោង០១ ទូរស័ព្ទដៃ ០៧គ្រឿងSAMSUNG J7ពណ៌ស០១ គ្រឿង iPhone 6plus ពណ៌ប្រផេះ០១គ្រឿង, iPhone 6 ពណ៌មាស០១គ្រឿង, Metfone ពណ៌ខ្មៅ០១គ្រឿង, Alcatel ពណ៌ខ្មៅ០១គ្រឿង, Nokia ពណ៌ ខ្មៅ០២គ្រឿង លុយដុល្លារ ៨៧៥ដុល្លារ លុយខ្មែរ ៣.៧០០.០០០រៀលឡាន០២គ្រឿង ម៉ាកបាឡែន ស្លាកលេខ ភ្នំពេញ 2V-7570 ពណ៌ស្ករម៉ាកឆ្លាម ស្លាកលេខ ភ្នំពេញ 2Q-7796 ពណ៌ទឹកប្រាក់។
លោកប្រធានការិយាល័យបានបញ្ជាក់ថា នៅថ្ងៃខែឆ្នាំវេលាម៉ោងកើតហេតុខាងលើ ទទួលបានព័ត៌មានពីប្រជាពលរដ្ឋថា៖ មានសកម្មភាពលេងល្បែងស៊ីសង(អាប៉ោង)នៅចំណុចផ្ទះឈ្មោះ ប៉ែន ថុល (ម្ចាស់ផ្ទះ)អាយុ៤៧ឆ្នាំ ភូមិទួលដូង ឃុំគគីរ ស្រុកកៀនស្វាយ ខេត្តកណ្ដាល៕ ឆ ដា
