សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ ត្រូវកម្លាំងប៉ុស្តិ៍នគរបាលរដ្ឋបាលចតុមុខ ឃាត់ខ្លួនជាក់ស្តែង បន្ទាប់ពីធ្វើសកម្មភាពលួចយកកាបូបស្ពាយពីនិស្សិតម្នាក់ស្នាក់នៅវត្តបទុមវតី បានសម្រេចហើយប្រុងរត់គេចខ្លួន ក៏ត្រូវជនរងគ្រោះដឹងទាន់ស្រែកឆោឡោផ្អើលដល់សមត្ថកិច្ចកំពុងល្បាតនៅក្បែរនោះ ចាប់ក្របួចជាប់ភ្លាមៗនាំមកសាកសួរ ។
ករណីឃាត់ខ្លួនចោរលួចកាបូបខាងលើនេះ បានធ្វើឡើងកាលពីវេលាម៉ោង១០និង៣០នាទីព្រឹកថ្ងៃព្រហស្បតិ៍ ៧កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹង នៅថ្ងៃទី១៩ ខែកក្កដា ឆ្នាំ២០១៨ នៅត្រង់ចំណុច ក្នុងវត្តបទុមវតី ខាងមុខកុដិព្រះគ្រូសូត្រស្តាំ ផ្លូវឧកញ៉ា ស៊ូ ស្រ៊ុន ភូមិ៣ សង្កាត់ចតុមុខ ខណ្ឌដូនពេញ រាជធានីភ្នំពេញ ។
ជនសង្ស័យឈ្មោះ ជា ច័ន្ទអូន ភេទប្រុស អាយុ២៧ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ (ឃាត់ខ្លួន) ។ ជនសង្ស័យធ្លាប់ប្រើប្រាស់សារធាតុញៀន ។
ម្ចាស់កាបូបមាន អេង ភីរុន ភេទប្រុស អាយុ២០ឆ្នាំ ជនជាតិខ្មែរ មុខរបរនិស្សិត ស្នាក់នៅវត្តបទុមវតី ផ្លូវឧកញ៉ា ស៊ូ ស្រ៊ុន ភូមិ៣ សង្កាត់ចតុមុខ ខណ្ឌដូនពេញ រាជធានីភ្នំពេញ ។ សម្ភារៈបាត់បង់រួមមាន ៖ អត្តសញ្ញាណប័ណ្ណសញ្ជាតិខ្មែរ ០១សន្លឹក ប័ណ្ណសម្គាល់យានយន្ត ចំនួន០១សន្លឹក, ប្រាក់ដុល្លារចំនួន ៣០០ដុល្លារ, ប្រាក់រៀលចំនួន ៧០,០០០រៀល, ទូរស័ព្ទដៃចំនួន ០១គ្រឿង និងកាតអេធីអ៊ឹម ចំនួន ០២សន្លឹក ។
បច្ចុប្បន្ន ជនសង្ស័យកំពុងឃាត់ខ្លួន នៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ អនុវត្តតាមនីតិវិធី ៕ ស តារា
