សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ជនសង្ស័យឆក់កាបូបយ៉ាងសកម្មនិជាមុខសញ្ញាប្រើប្រាស់គ្រឿងញៀនម្នាក់ក្នុងចំណោមបក្ខពួក២នាក់ ត្រូវបាននគរបាលស្រុកអង្គស្នួលធ្វការចាប់ខ្លួន បន្ទាប់ពីជនសង្ស័យខាងលើធ្វើសកម្មភាពឆក់កាបូបនារីម្នាក់ ខណៈជិះម៉ូត កាលពីវេលាម៉ោង១៩និង៤០នាទីថ្ងៃចន្ទ ១១កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៣ ខែកក្កដា ឆ្នាំ២០១៨ ស្ថិតក្នុងភូមិចុងបង្គោល ឃុំបែកចាន ស្រុកអង្គស្នួល ខេត្តកណ្តាល ។
មន្ត្រីនគរបាលស្រុកអង្គស្នួលបានឲ្យដឹងថា ជនសង្ស័យចាប់ខ្លួនបានឈ្មោះ វណ្ណា វណ្ណេត ភេទប្រុស អាយុ១៦ឆ្នាំជនជាតិខ្មែរ មុខមិនពិតប្រាកដ មានទីលំនៅភូមិថ្មដា សង្កាត់កន្ទោក ខណ្ឌពោធិសែន រាជធានីភ្នំពេញ រីឯជនសង្ស័យម្នាក់ទៀតដែលរត់គេចខ្លួនមានឈ្មោះ ខែម ម៉េងលន់ ហៅ គុណ ភេទប្រុស អាយុ២០ឆ្នាំ ជនជាតិខ្មែរ មុខរបរសិស្ស មានទីលំនៅភូមិព្រៃបឹង ឃុំបែកចាន ស្រុកអង្គស្នួលខេត្តកណ្តាល ។ ចំណែកនារីរងគ្រោះឈ្មោះ វណ្ណះ ស្រីនន់ អាយុ១៨ឆ្នាំ មុខរបរ និស្សិតពេទ្យឆ្នាំទី១ មានទីលំនៅភូមិអង្គស្នួលទី២ ឃុំពើក ស្រុកអង្គស្នួល ខេត្តកណ្តាល ។ ដោយឡែកសម្ភារះបាត់បង់មាន៖ ទូរស័ព្ទដៃម៉ាកiPhone7+ ពណ៌ខ្មៅ០១គ្រឿង ,កាបូបដៃពណ៌សុកូឡា ០១ ,លុយខ្មែរ ៥៥.៥០០រៀល ,ក្រវឹលប្រាក់០១គូរ រីឯវត្ថុតាងដកហូតបានមកវិញមាន៖ កាបូបដៃពណ៌សូកូឡា ០១ ,លុយខ្មែរ ៥៥.៥០០រៀល ,ក្រវិលប្រាក់០១គូ និងម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ កណ្តាល 1Y-6172 ។
ប្រភពដដែលបន្តថា នៅវេលាម៉ោងកើតហេតុខាងលើនារីរងគ្រោះឈ្មោះ មាស សុវណ្ណារា ភេទប្រុស អាយុ២០ឆ្នាំ ជាសិស្ស បានឌុបគ្នាចេញពីសាលាចំណេះសាកលរៀនកុំព្យុទ័រនៅភូមិត្រពាំងក្រសាំង ឃុំបែកចាន ស្រុកអង្គស្នួល ខណៈនោះក៏មានជនសង្សូយ២នាក់ខាងលើជិះឌុបគ្នាខាងក្រោយនារីរងគ្រោះ លុះមកដល់ចំណុចកើតហេតុស្រាប់តែជនសង្ស័យបានធ្វើសកម្មភាពឆក់កាបូបដៃ ពីជនរងគ្រោះ រួចជិះម៉ូតូរត់គេចតែគេចមិនផុតក៏ទៅបុក និងម៉ូតូរបស់សមត្ថកិច្ចម៉ាកសុីរុះពណ៌ ទឹកប្រាក់នៅចំណុចផ្លូវលំភូមិព្រៃក្រាយឃុំព្រៃពួចស្រុកអង្គស្នួល បណ្តាលឲ្យដួលទើប ឃាត់ខ្លនបានជនសង្ស័យ០១នាក់ ។
តាមចម្លើយសារភាពរបស់ ជនសង្ស័យឈ្មោះវណ្ណា វណ្ណេតបានសារភាពថា៖ ខ្លួនបានបើកម៉ូតូធ្វើសកម្មភាពឆក់កាបូបពីជនរងគ្រោះ ហើយខ្លួនចេះប្រើប្រាស់ថ្នាំញៀនរយៈពេល៥ខែមកហើយ ។
ករណីនេះកម្លាំងជំនាញ កំពុង បន្តធ្វើកិច្ចការស្រាវជ្រាវនិងស៊ើបអង្កេត បន្តចាត់ការតាមនីតីវិធី ៕ ស្អាងជ័យ
