សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ កម្លាំងសមត្ថកិច្ចមូលដ្ឋានបានឃាត់ខ្លួនជនសង្ស័យម្នាក់ត្រូវជាបងបង្កើតជនរងគ្រោះ បន្ទាប់ពីផឹកស្រាស្រវឹងជោកមានជម្លោះពាក្យសំដី បានប្រើហិង្សាដោយទាញយកស្នប់ធ្វើអំពីឫស្សីវាយក្បាលបណ្ដាលឲ្យរងរបួសធ្ងន់ ត្រូវបានក្រុមគ្រួសារបញ្ជូនមកព្យាបាលនីគ្លីនិកឯកជនដើម្បីសង្គ្រោះជីវិត ។
ការឃាត់ខ្លួននេះបានធ្វើឡើងកាលពីយប់នៅថ្ងៃសុក្រ ៧រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣ ខែសីហា ឆ្នាំ២០១៨ នៅចំណុចភូមិរោងដំរី ឃុំស្វាយចេក ស្រុករំដួល ខេត្តស្វាយរៀង ។
យោងតាមសមត្ថកិច្ចកងរាជអាវុធហត្ថ ស្រុកបានឲ្យកាសែតនគរវត្តដឹងថា ជនសង្ស័យដែលឃាត់ខ្លួនមានឈ្មោះគង់ សាវ៉ាន់ អាយុ៣៧ឆ្នាំ មុខរបរកសិកររស់នៅភូមិរោងដំរី ឃុំស្វាយចេក ស្រុករំដួល ខេត្តស្វាយរៀង ។
ចំណែកជនរងគ្រោះជាប្អូនមានឈ្មោះគង់ សាវី ភេទប្រុស អាយុ២២ឆ្នាំ មុខរបរកសិកររស់នៅភូមិ ឃុំជាមួយគ្នា ខណៈរងរបួសត្រង់ចំកណ្ដាលក្បាល បណ្ដាលឲ្យរងរបួសធ្ងន់ ។
តាមចម្លើយសារភាពរបស់ជនសង្ស័យបានសារភាពប្រាប់សមត្ថកិច្ចថា ខ្លួនពិតជាបានធ្វើសកម្មភាពប្រើហិង្សាវាយប្អូនពិតប្រាកដមែន ដោយសារមូលហេតុមានទាស់ពាក្យសម្ដីគ្នាក្នុងពេលផឹកស៊ីណាមួយស្រវឹងស្រាផង ក៏ចិត្តខ្លាំងតែម្ដង ។
បច្ចុប្បន្នជនរងគ្រោះត្រូវបានក្រុមគ្រួសារយកមកព្យាបាលនៅគ្លីនិកឯកជនចំណែក ជនសង្ស័យត្រូវជាបងត្រូវបានសមត្ថកិច្ចឃាត់ខ្លួននៅប៉ុស្តិ៍រដ្ឋបាល ឃុំដើម្បីកសាងសំណុំរឿងបញ្ជួនខ្លួនមកអធិការនគរបាល ស្រុករំដួលដើម្បីចាតការបន្តតាមច្បាប់ ៕ យឹម សុថាន
