សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រជាពលរដ្ឋប្រទះឃើញសពនារីវ័យក្មេងម្នាក់ អណ្តែតទឹកស្រះនៅក្នុងវត្តនាគវ័ន្តបង្កឲ្យមានការភ្ញាក់ផ្អើលឡើងកាលពីម៉ោងជាង២រំលងអធ្រាត្រ ឈានចូលថ្ងៃទី៤ ខែកញ្ញា ឆ្នាំ២០១៨ ត្រង់ចំណុចស្រះទឹកក្នុងវត្តនាគវ័ន្ត ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ប្រភពព័ត៌មានពីលោកអ៊ុំម្នាក់មានឈ្មោះ ជុង សុខនី អាយុ៤៥ឆ្នាំ ដែលជាអ្នកមើលថែរក្សានៅក្នុងវត្តបានរៀបរាប់ប្រាប់ឲ្យដឹងថា នៅមុខពេលកើតហេតុគាត់បានដើរត្រួតពិនិត្យសន្តិសុខសុវត្ថិភាពក្នុងបរិវេណវត្ត រួចគាត់ក៏បានទៅសំរាកនៅលើអង្រឹងនៅក្បែរវិហារ។ លុះដល់ពេលកើតហេតុស្រាប់តែមានក្មេងប្រុសម្នាក់ឈ្មោះ មែន បានរត់មកប្រាប់គាត់ថាឃើញសពអណ្តែតក្នុងទឹកស្រះ ហើយគាត់មិនជឿនោះទេ តែដោយមិនអស់ចិត្តគាត់ក៏បានដើរទៅមើលក៏បានឃើញសាកសពអណ្តែតទឹកស្រះពិតប្រាកដមែន ។ ភ្លាមនោះគាត់បានរត់ទៅហៅប្រជាការពារភូមិឲ្យទាក់ទងទៅសមត្ថកិច្ចឲ្យចុះមកត្រួតពិនិត្យនៅកន្លែងកើតហេតុ។
ប្រភពបានឲ្យដឹងទៀតថា សពនារីអណ្តែតនេះ គឺមានសតិមិនគ្រប់ទេ ហើយរយៈពេល២ទៅ៣ខែកន្លងមកនេះ គឺតែងតែឃើញនាងមកអង្គុយលេងនៅក្នុងបរិវេណវត្តជារៀងរាល់ថ្ងៃ ប៉ុន្តែមិនដឹងផ្ទះសម្បែងនៅឯណាទេ។
បន្ទាប់ពីកើតហេតុសមត្ថកិច្ចមូលដ្ឋាន និងសមត្ថកិច្ចជំនាញកោសល្យវិច្ច័យបានចុះមកដល់កន្លែងកើតហេតុ ហើយបានស្រង់សពនារីយកមកលើគោកដើម្បីត្រួតពិនិត្យ បន្ទាប់ពីពិនិត្យរួចឃើញថា សពនារីនេះពិតជាស្លាប់ដោយសារតែការលង់ទឹកពិតប្រាកដមែន ។ បច្ចុប្បន្នសពត្រូវបានសមត្ថកិច្ចដឹកយកទៅតម្កល់នៅវត្តទឹកថ្លាដើម្បីរកចាំសាច់ញាតិមកទទួលយកទៅធ្វើបុណ្យទៅតាមប្រពៃណី ៕ ជ្រោយពេជ្រ
