សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ មិនដឹងថា វិបត្តិអ្វីបើកម៉ូតូ មកលោតទឹកសម្លាប់ខ្លួននៅលើស្ពានជ្រោយចង្វាថ្មី តែត្រូវបានប្រជាពលរដ្ឋនេសាទត្រីនៅក្បែរនោះចេញជួយសង្គ្រោះទាន់ពេល។
ហេតុការណ៍ភ្ញាក់ផ្អើលនេះបានកើតឡើងកាលពីម៉ោងជាង១០ព្រឹក ថ្ងៃទី០២ ខែតុលា ឆ្នាំ២០១៨ នៅចំណុចលើស្ពានជ្រោយចង្វាថ្មី ស្ថិតក្នុងភូមិដើមគរ សង្កាត់-ខណ្ឌជ្រោយចង្វា ។
សមត្ថកិច្ចបានឲ្យដឹងថា បុរសដែលមកលោតទឹកសម្លាប់ខ្លួនមានឈ្មោះ លឹម សម្បត្តិ អាយុ ៣០ឆ្នាំ មានមុខរបរ ស្នាក់នៅផ្ទះ៧អា ផ្លូវលំ ភូមិត្នាត សង្កាត់សឹងមានជ័យ ខណ្ឌមានជ័យ ។
ប្រភពពត៌មាននៅកន្លែងកើតហេតុ បាន ឲ្យដឹងថា មុនកើតហេតុ គេបានឃើញបុរសម្នាក់ជិះម៉ូតូ មួយគ្រឿង ម៉ាក Today ពណ៌ខៀវ ពាក់ស្លាកលេខ ភ្នំពេញ 1CJ-3086 បានធ្វើដំណើរក្នុងទិសដៅពីកើតមកលិច ខណៈធ្វើដំណើរមកដល់ចំណុចលើស្ពានជ្រោយចង្វាថ្មី ក៏ឈប់ម៉ូតូលោតចុះពីលើស្ពានតែម្តង។ ភ្លាមៗនោះ ត្រូវបានប្រជាពលរដ្ឋអ្នកនេសាទត្រីនៅក្បែរនោះ បានចេញទូកនេសាទជួយសង្គ្រោះទាន់ពេលវេលា ហើយបាននាំបុរសនោះឲ្យសមត្ថកិច្ចប៉ុស្តិ៍នគរបាលរដ្ឋបាលជ្រោយចង្វា ដើម្បីសាកសួរ និងទាក់ទងរកសាច់ញាតិរបស់គេ។
ចំពោះមូលហេតុនៃការលោតសម្លាប់ខ្លួនរបស់បុរសរូបនេះ គឺមិនទាន់អាចសុំការបំភ្លឺបាននោះទេ ៕ ជ្រោយពេជ្រ
