ស្លាប់ និងរងរបួស៥នាក់ ករណីគ្រោះថ្នាក់ចរាចរម៉ូតូ បុកម៉ូតូនៅមុខវត្តព្រែកព្នៅ

ភ្នំពេញ៖ មនុស្ស៥នាក់ ម្នាក់ស្លាប់យ៉ាងអាណោចអាធ័ម និង ៤នាក់ទៀតរងរបួសធ្ងន់ ស្រាល ក្នុងករណីគ្រោះថ្នាក់ចរាចរណ៍ រវាងម៉ូតូ នឹងម៉ូតូបុកគ្នានៅមុខវត្តព្រែកព្នៅ កាលពីវេលាម៉ោង៧និង៣០នាទីយប់ ថ្ងៃអង្គារ ៨រោច ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២ ខែតុលា ឆ្នាំ២០១៨ ត្រង់ចំណុចនៅមុខវត្តព្រែកព្នៅ ក្នុងភូមិឡកំបោរ សង្កាត់ស្វាយប៉ាក ខណ្ឌព្រែកព្នៅ។

ជនរងគ្រោះ(សព) មានឈ្មោះ ជ័យ នុប អាយុ៧១ឆ្នាំ មុខរបរ អាចារ្យបុណ្យ រស់នៅ​ភូមិឡកំបោរ សង្កាត់ស្វាយប៉ាក ខណ្ឌព្រែកព្នៅ មានប្រពន្ធ ឈ្មោះ គីម យាង អាយុ៦២ឆ្នាំ មុខរបរនៅផ្ទះ មានកូនចំនួន៦នាក់ ស្រី៣ ប្រុស៣ រស់នៅជាមួយជនរងគ្រោះខាងលើ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនដំបូង គេឃើញលោកតាអាចារ្យ ទាំងបីនាក់បានជិះម៉ូតូអាសង់ក្បាលត្រីអណ្ដែងស៊េរីចាស់ ពណ៌ខ្មៅ ពាក់ស្លាកលេខ ឋ 4973 ភព1 ចេញពីវត្តព្រែកព្នៅ ឆ្លងផ្លូវមិនប្រយ័ត្នត្រូវបានម៉ូតូ១ គ្រឿង ម៉ាក ឌ្រីមសង់C125 ពណ៌ខ្មៅស៊េរី2018 ពាក់ស្លាកលេខ ព្រៃវែង 1L-1578 ជិះ គ្នា២នាក់តាមបណ្ដោយផ្លូវជាតិលេខ៥ ទិសដៅពីត្បូងទៅជើង យ៉ាងលឿន លុះមកដល់កន្លែងកើតហេតុខាងលើក៏បុក ពេញទំហឹងបណ្ដាលឲ្យ បោកក្បាលបែកមុខបែកមាត់ស្លាប់តាអាចារ្យ ម្នាក់ ដែលជិះខាងក្រោយ និងរងរបួសធ្ងន់តាអាចារ្យ ភ្លុក២នាក់ ចំណែកភាគីម្ខាងទៀត រងរបួស២នាក់ សរុបទាំងអស់រងរបួសធ្ងន់ស្រាលចំនួន៤នាក់ ត្រូវបានរថយន្តសង្គ្រោះបានដឹកយកទៅមន្ទីរកាល់ម៉ែតភ្លាមៗផងដែរ។

ក្រោយកើតហេតុសមត្ថកិច្ចមូលដ្ឋានចុះមកដល់កន្លែងកើតហេតុបានទាក់ទងទៅជំនាញចរាចរណ៍វាស់វែង យកម៉ូតូទាំង២គ្រឿងទៅរក្សាទុកនៅការិយាល័យចរាចរណ៏ជើងគោក នៃស្នងការនគរបាលរាជធានីភ្នំពេញ ដើម្បីដោះស្រាយគ្នាតាមច្បាប់ ។ ចំណែកសាកសពត្រូវបានសាច់ញាតិមកយកទៅដាក់នៅផ្ទះ ដើម្បីធ្វើបុណ្យតាមប្រពៃណី ៕ ចាន់ធឿន