សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ក្មេងស្ទាវម្នាក់ បើកម៉ូតូគ្មានពាក់មួកសុវត្ថិភាព ឃើញម៉ូតូ១គ្រឿងទៀតកំពុងបើកពីមុខ មានឌុបកូនក្រមុំម្នាក់ ស្រាប់តែបើកកាច់ចង្កេះជ្រែ ក៏ជ្រុលចង្កូតបុកម៉ូតូស្រ្តីនោះ ចំពាក់កណ្តាលតួ ដួលច្រងាប់ច្រងិលទាំងអស់គ្នា បណ្តាលឲ្យក្មេងស្ទាវនោះ ស្លាប់់ភ្លាមៗ ឯស្រ្តី២នាក់កូនស្រី របួសធ្ងន់ ។
គ្រោះថ្នាក់រវាងម៉ូតូ២គ្រឿងបុកនេះ បានកើតឡើងកាលពីម៉ោង៣ និង២០នាទីរសៀល ថ្ងៃទី១១ ខែតុលា ឆ្នាំ២០១៨ លើផ្លូវលេខ១៤៤០ ស្ថិតក្នុងភូមិគោកសណ្តែក ឃុំក្រាំងចេក ស្រុកឧដុង្គ ខេត្តកំពង់ស្ពឺ ។
សមត្ថកិច្ចបានឲ្យដឹងថា ក្មេងស្ទាវបង្កហេតុ ឈ្មោះ ឆិល សុផា ភេទប្រុស អាយុ២៣ឆ្នាំ រស់នៅភូមិកណ្តក់ ឃុំព្រៃក្រសាំង ស្រុកឧដុង្គ ខេត្តកំពង់ស្ពឺ បើកម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ ១GR-៩២៨២ ។ ចំណែកស្រ្តីរងគ្រោះ ឈ្មោះ យ៉ែម សុីណា អាយុ៤៨ឆ្នាំ បើកម៉ូតូម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ ១V-៨៣០០ និងកូនស្រីឈ្មោះ ណៃ ប៊ូង៉ា អាយុ២០ឆ្នាំ ។ ពួកគាត់ទាំង២នាក់ រស់នៅភូមិអង្គរបាន ឃុំយុទ្ធសាមគ្គី ស្រុកឧដុង្គ ខេត្តកំពង់ស្ពឺ ។
ប្រភពព័ត៌មានសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញម៉ូតូទាំង២គ្រឿង បើកស្របទិសគ្នាពីជើង ទៅត្បូងដោយស្រ្តីរងគ្រោះ បើកពីមុខមានដឹកកូនស្រីម្នាក់។ ចំណែកយុវជនបង្ក បើកពីក្រោយ ដោយល្បឿនលឿនជ្រែយានយន្តអ្នកដំណើរ មិនដឹងប្រញាប់ទៅណាទេ ។ លុះម៉ូតូទាំង២គ្រឿង មកដល់ទន្ទឹមគ្នា ម៉ូតូក្មេងស្ទាវ បានកាច់ចង្កូតគេចពីរថយន្តបើកមកពីខាងមុខ ក៏ជ្រុលចង្កូតបុកម៉ូតូស្រ្តីរងគ្រោះ ចំពាក់កណ្តាលតួ បណ្តាលឲ្យម៉ូតូទាំង២គ្រឿង ដួលច្រងាប់ច្រងិល ដោយក្មេងស្ទាវ ស្លាប់នៅភ្លាមៗ ឯស្រ្តី២នាក់កូនក្រមុំ រងរបួសធ្ងន់ ហើយអ្នកទាំង៣ គ្មានពាក់មួកសុវត្ថិភាពទាំងអស់គ្នា និងម៉ូតូទាំង២គ្រឿងខូចខាតធ្ងន់ធ្ងរ។
ក្រោយកើតហេតុ សមត្ថកិច្ចបានចុះដល់កន្លែងកើតហេតុ ប្រញាប់អន្តរាគមន៍បញ្ជូនជនរងគ្រោះ ទៅមន្ទីរពេទ្យ ។ ចំណែកសាសព បានប្រគល់ជូនក្រុមគ្រួសារ ដឹកយកទៅគេហដ្ឋាន រៀបចំធ្វើបុណ្យតាមប្រពៃណី ។ ដោយឡែកយានយន្តទាំង២គ្រឿង សមត្ថកិច្ចយកមករក្សាទុកនៅអធិការដ្ឋាននគរបាលជាបណ្តោះអាសន្ន រង់ចាំដោះស្រាយនៅពេលក្រោយ ៕ សេនាស័ក្តិ
