សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជិះម៉ូតូក្នុងល្បឿនលឿនមិនប្រយ័ត្ន ក៏ធ្លាក់ជង្ហុកដួលអូសជាច្រើនម៉ែត្រ បណ្តាលឲ្យបោកក្បាល និងថ្នល់ស្លាប់ ភ្លាមៗ ។
ហេតុការណ៍នេះបានកើតឡើង កាលពីវេលាម៉ោង១០ និង៣០នាទីយប់ ថ្ងៃទី២៩ ខែតុលា ឆ្នាំ២០១៨ ស្ថិតនៅចំណុចមុខការ៉ាសសាំង PTT តាមបណ្តោយផ្លូវសហពន្ធ័រុស្ស៊ី ក្នុងភូមិតាងួន២ សង្កាត់កាកាប១ ខណ្ឌពោធិសែនជ័យ ។
ជនរងគ្រោះដែលស្លាប់មានឈ្មោះ លៀម ទួន ភេទប្រុស អាយុ៣៩ឆ្នាំ មុខរបរអ្នកខ្វៃជ្រូក ស្នាក់នៅភូមិ៩ សង្កាត់ទឹកល្អក់៣ ខណ្ឌទួលគោក សព្វថ្ងៃស្នាក់នៅខាងផ្ទះប្រពន្ធ សង្កាត់កាកាប២ ខណ្ឌពោធិសែនជ័យ ។
តាមប្រភព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញជនរងគ្រោះជិះម៉ូតូមួយគ្រឿងម៉ាកហុងដាឃ្លីក ពណ៌ខ្មៅ ពាក់ស្លាកលេខ ភ្នំពេញ 1GO-3713 ធ្វើដំណើរក្នុងទិសដៅពីលិចទៅកើត ក្នុងល្បឿនយ៉ាងលឿន លុះមកដល់ចំណុចកើតហេតុ ក៏រេចង្កូតធ្លាក់ជង្ហុកដួលអូសជាច្រើនម៉ែត្រ បណ្តាលឲ្យជនរងគ្រោះដួលបោកក្បាល និងថ្នល់ស្លាប់នៅ និងកន្លែងកើតហេតុភ្លាមៗ ។ បន្ទាប់មកប្រជាពលរដ្ឋឃើញហេតុការណ៍នេះបានរាយការណ៍ទៅសមត្ថកិច្ចចុះមកដល់កន្លែងកើតហេតុ រួចបានទំនាក់ទំនងទៅសាច់ញាតិក្រុមគ្រួសារសព ចុះមកដល់បានស្រែកទ្រហោយំឱបសពជនរងគ្រោះគួឲ្យសង្វេគ ។
ក្រោយកើតហេតុ សមត្ថកិច្ចជំនាញមូលដ្ឋានចុះទៅដកហូតម៉ូតូយកទៅរក្សាទុកបណ្ដោះអាសន្ន និងធ្វើកោសល្យវិច័យសព រួចប្រគល់ជូនសាច់ញាតិយកទៅធ្វើបុណ្យនៅគេហដ្ឋានតាមប្រពៃណី ៕ សុខាសែនជ័យ
