សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់រងរបួសបាក់កជើងខាងស្ដាំធ្ងន់ ខណៈដែលជួបករណីគ្រោះថ្នាក់ចរាចរណ៍ជិះម៉ូតូបត់ឆ្វេងមិនប្រយត្ន័ ត្រូវរថយន្តម៉ាកកាម៉ារីឆ្លាម ពណ៌ សំបកឪឡឹក ទិសដៅបញ្ច្រាសគ្នា ចាប់ហ្វ្រាំងមិនទាន់ ក៏បុកយ៉ាងពេញទំហឹង លាន់ដូចរន្ទះបង្កការភ្ញាក់ផ្អើលដល់អ្នកភូមិកាលពីថ្ងៃទី២០ ខែវិច្ឆិកា ឆ្នាំ២០១៨ វេលាម៉ោង៦និង២៥នាទីល្ងាច នៅលើផ្លូវជាតិលេខ១ ត្រង់ចំណុចគីឡូម៉ែត្រលេខ១៤៨-១៤៩ ស្ថិតក្នុងភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង ។
យោងតាមសមត្ថកិច្ចនគរបាលក្រុងបាវិតបានឲ្យដឹងថា បុរសរងរបួសធ្ងន់មានឈ្មោះជា រី អាយុ៤៥ឆ្នាំ ជនជាតិខ្មែរមុខរបរកសិករ មានទីលំនៅភូមិខាងលិចវត្ត ឃុំត្នោត ស្រុកកំពង់រោទ៍ ខេត្តស្វាយរៀង ជិះម៉ូតូម៉ាក ហុងដា C១២៥ ពណ៌ខ្មៅ ពាក់ស្លាកលេខ ភ្នំពេញ 1GF.5914 ខូចខាតយ៉ាងដំណំ ។
ចំណែកអ្នកបើករថយន្តត្រូវបានស្គាល់ឈ្មោះ មឿន សាម៉េត ភេទប្រុស អាយុ៣៤ឆ្នាំ មុខរបរបើករថយន្តរត់តាក់ស៊ី មានទីលំនៅភូមិកំពោតលៀប សង្កាត់ព្រៃអង្គុញ ក្រុងបាវិត ខេត្តស្វាយរៀង ក្រោយពីបង្កហេតុរួចបានរត់គេចខ្លួនបាត់ស្រមោល ។
តាមសាក្សីបានឲ្យដឹងថា មុនកើតហេតុមានបុរសម្នាក់បានជិះ ម៉ូតូមួយគ្រឿងម៉ាកហុងដាC១២៥ពណ៌ខ្មៅដោយធ្វើដំណើរពីកើតមកលិចហើយ ក៏បានបត់់ឆ្វេងខ្វះប្រុងប្រយត្ន័ស្រាប់តែមានរថយន្ត១គ្រឿងម៉ាកកាម៉ារីឆ្លាម ពណ៌ សំបកឪឡឹក ពាក់ស្លាកលេខភ្នំពេញ2C.1566មកបញ្ច្រាសទិសគ្នា ក៏បុកពេញទំហឹងលាន់ដូចរន្ទះបាញ់បង្កការភ្ញាក់ផ្អើលតែម្ដង ។
បន្ទាប់ពីមានគ្រោះថ្នាក់ចរាចរណ៍នេះ អ្នកបើករថយន្តឃើញសភាពការណ៍មិនស្រួល ក៏បើកទ្វារត់គេចខ្លួនភ្លាមៗ បន្សល់តែបុរសរងគ្រោះនៅនឹងកន្លែង ។
បច្ចុប្បន្នបុរសដែលរងរបួសត្រូវបានសមត្ថកិច្ចបានបញ្ជូនទៅសម្រាកព្យាបាលនៅមន្ទីរពេទ្យខេត្តស្វាយរៀង និងវាស់វែងអូសយកវត្ថុតាងទាំង២គ្រឿង យកមករក្សាទុកនៅប៉ុស្តិ៍រដ្ឋបាលព្រៃអង្គុញ ដើម្បីបំពេញសំណុំរឿងតាមនីតិវិធី ៕ យឹម សុថាន
