សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មន្ត្រីនគរបាល៤នាក់ បានរងរបួសក្នុងករណីគ្រោះថ្នាក់ ចរាចរណ៍គួរឲ្យរន្ធត់ បន្ទាប់ពីបើករថយន្តទំនងងងុយដេករេចង្កូតបុកចូលផ្ទះរបស់ប្រជាពលរដ្ឋ បង្កការភ្ញាក់ផ្អើលដល់ម្ចាស់ផ្ទះភ័យ ព្រលឹងចុងសក់ តែមិនរងគ្រោះថ្នាក់ដល់ជីវិត ។
ហេតុការណ៍គ្រោះថ្នាក់ចរាចរណ៏បានកើតឡើងកាលពីវេលាម៉ោង១១:៣៦ នាទី យប់ថ្ងៃទី ០៦ ខែ ធ្នូ ឆ្នាំ ២០១៨ ស្ថិតលើផ្លូវជាតិលេខ ១៣ ក្នុងភូមិ ព្រះទន្លេ សង្កាត់ សង្ឃ័រ ក្រុង ស្វាយរៀង ។
សមត្ថកិច្ចនគរបាលក្រុងស្វាយរៀងបានឲ្យដឹងថា: បុរសដែលបើករថយន្តមានឈ្មោះសូ រីណា ភេទ ប្រុស អាយុ ២៨ ឆ្នាំ មុខរបរ ជាមន្ត្រីនគរបាល រស់នៅភូមិ ធំ ឃុំ ពោធិ៍រាជ ស្រុក ស្វាយជ្រំ ខេត្ត ស្វាយរៀង និងអ្នករួមដំណើរឈ្មោះនាង សុវណ្ណចាន់រ៉ា ភេទ ប្រុស អាយុ ៣០ ឆ្នាំ មុខរបរមន្ត្រី នគរបាល រស់នៅភូមិ ពងទឹក ឃុំ ពងទឹក ស្រុក រំដួល ខេត្ត ស្វាយរៀង ទី២.ឈ្មោះ ជ័យ ឡងឌី ភេទ ប្រុស អាយុ ២៣ ឆ្នាំ មុខរបរ កម្មករ រស់នៅភូមិ បឹងវែង ឃុំ ស្វាយជ្រំ ស្រុក ស្វាយជ្រំ ខេត្ត ស្វាយរៀង និងទី៣.ឈ្មោះ ជួប ចិន្ដា ភេទ ប្រុស អាយុ ២៣ មុខរបរ នៅផ្ទះ រស់នៅភូមិ ចក ឃុំ ចក ស្រុក រំដួល ខេត្ត ស្វាយរៀង ។
ប្រភពបន្តថាចំណែកម្ចាស់ផ្ទះដែលត្រូវរថយន្តបើកបុកចូលនោះមានឈ្មោះ ហុង ពៅ ភេទ ប្រុស អាយុ ៤០ ឆ្នាំ មុខរបរ កសិករ រស់នៅភូមិ ព្រះទន្លេ សង្កាត់ សង្ឃ័រ ក្រុង ស្វាយរៀង ខេត្ត ស្វាយរៀងផ្ទះខូចខាតស្ទើទាំងស្រុង ។
តាមសាក្សីបានឲ្យដឹងថាមុនកើតហេតុមានរថយន្តមួយគ្រឿងម៉ាកហាយឡែនឌឺ ពណ៌ ទឹកមាស ពាក់ស្លាកលេខ ភ្នំពេញ ២AS ៩៤៩០ ជិះគ្នា៤នាក់ក្នុងទិសដៅ ពីជើងទៅត្បូង ខណៈនោះទំនងងងុយដេកស្រាប់តែរ៉េចង្កូតធ្លាក់ផ្លូវបោលបុកចូលផ្ទះប្រជាពលរដ្ឋយ៉ាងពេញទំហឹងផ្អើលភ្ញាក់ម្ចាស់ផ្ទះភ័យព្រលឹងចុងសក់។
ចំណែកអ្នករងរបួសត្រូវបានដឹកមកកាន់មន្ទីរពេទ្យបង្អែកខេត្តស្វាយរៀងភ្លាមៗ និងវាស់វែងអូសយករថយន្តមកកាន់អធិការដ្ឋានដើម្បីដោះស្រាយតាមច្បាប់ ៕ យឹម សុថាន
