មនុស្ស៤នាក់រងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រវាងរថយន្ត បុករថយន្ត

ខេត្តកំពង់ធំ៖ គ្រោះថ្នាក់ចរាចរណ៍រវាង រថយន្ត បុករថយន្ត ក្នុងទិសដៅស្របគ្នា(ពីត្បូងទៅជើង) បណ្តាលឲ្យមនុស្សស្រី៤នាក់រង របួស ស្រាលឯរថយន្តចំនួន០២គ្រឿង ខូចខាតយ៉ាងដំណំ ហេតុការណ៍នេះបានកើតឡើង កាលពីវេលាម៉ោង១៣ៈ១០នាទីថ្ងៃសៅរ៍ ១៤រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៥ ខែមករា ឆ្នាំ២០១ លើកំណាត់ផ្លូវជាតិលេខ០៦ ភូមិអង់ឃ្លាំ ឃុំប្រឡាយ ស្រុកស្ទោង ខេត្តកំពង់ធំ ។

សមត្ថកិច្ចបានអោយដឹងថា រថយន្តម៉ាកហ៊ីយ៉ាន់ដាយ ពណ៌ស ស្លាកលេខសៀមរាប3A.2192(ដឹកអ្នកដំណើរ) បើកបរដោយឈ្មោះ ជា.សាឌី ភេទប្រុស អាយុ៤៦ឆ្នាំ នៅភូមិគោកធ្លក ឃុំកន្តែក ស្រុកបាគងខេត្តសៀមរាប(នាំខ្លួនទៅអធិការដ្ឋាននគរបាលស្រុកស្ទោង) ។

ចំណែករថយន្តម៉ាកឡិចស៊ីស ពណ៌ប្រផេះ ស្លាកលេខភ្នំពេញ2AJ.0288 បើកបរដោយឈ្មោះ លឹម.ឡាក់ ភេទប្រុស អាយុ៣៤ឆ្នាំ នៅសង្កាត់បឹងកេងកង២ ខណ្ឌចំការមន រាជធានីភ្នំពេញ និងអ្នករួមដំណើរ០៤នាក់ ជាក្រុមគ្រួសារ(របួសស្រាល) ។

មូលហេតុបឋមបង្កឡើងដោយ អ្នកបើកបររថយន្តម៉ាកហ៊ីយ៉ាន់ដាយបើកបរមានល្បឿនលឿនខ្វះការប្រុងប្រយ័ត្ន ទៅបុកគូទរថយន្តឡិចសុីស ដែលកំពុងបន្ថយល្បឿនពេលឃើញសត្វគោកំពុងឆ្លងកាត់ផ្លូវថ្នល់ ៕ ប៊ុនរិទ្ធី