សារព័ត៌មាន នគរវត្ត តែងតែនាំមុខគេជានិច្ច
សារព័ត៌មាន Bloomberg បានដកស្រង់សម្តីលោក Ren Zhengfei អាយុ៧៤ឆ្នាំ បានបញ្ជាក់នៅក្នុង វេទិកាតុមូលជាមួយបណ្តាអ្នកសារព័ត៌មានសំខាន់ៗជុំវិញពិភពលោកថា «ខ្ញុំស្រឡាញ់ទឹកដីរបស់ខ្លួន ខ្ញុំគាំទ្រ បក្សកុម្មុយនិស្តចិន ប៉ុន្តែខ្ញុំមិនធ្វើអ្វីបង្កការខូចខាតដល់ពិភពលោកនោះឡើយ» ។
លោក Ren Zhengfei មហាសេដ្ឋី បង្កើតក្រុមហ៊ុនHuawei បានបំបែកភាពស្ងប់ស្ងាត់ជាច្រើនឆ្នាំកន្លងមក ក្រោយពេល ក្រុមហ៊ុនបច្ចេកវិទ្យារបស់លោក ប្រឈមនឹងវិបត្តិ ទ្រង់ទ្រាយធំបំផុត មិនធ្លាប់មាន ក្នុងរយៈពេល៣ទសវត្សរ៍ កន្លងមក ។
មហាសេដ្ឋីក្រុមហ៊ុនទូរគមនាគមន៍ចិន លោក Ren Zhengfei បានហៅលោកត្រាំថា «ប្រធានាធិបតីដ៏អស្ចារ្យ» ។ លោកបន្តទៀតថា លោករង់ចាំមើលថា តើមេដឹកនាំអាមេរិក លូកដៃទៅក្នុងករណីកូនស្រីរបស់លោក អគ្គនាយកហិរញ្ញវត្ថុ Meng Wanzhou ដែលកាណាដាបានចាប់ខ្លួន ហើយកំពុងប្រឈមនឹងការបញ្ជូនទៅកាន់អាមេរិកដែរ ឬទេ។
ការបង្ហាញវត្តមានរបស់មហាសេដ្ឋី Huawei លើកចុងក្រោយបំផុត គឺនៅឆ្នាំ២០១៥ តាំងពីពេលនោះមក លោកមិនដែលបង្ហាញខ្លួន តាមប្រព័ន្ធផ្សព្វផ្សាយនានានោះឡើយ។ នៅពេលនេះ លោកបានបញ្ចេញប្រតិកម្ម មានន័យថា ស្ថានភាពកាន់តែតានតឹង ដោយការវាយប្រហារ មកលើក្រុមហ៊ុន Huawei ជានិមិត្តរូប ធំបំផុតនៃបច្ចេកវិទ្យារបស់ចិន។
លោកបន្តទៀតថា «ប្រសិនបើពួកគេ មិនចង់ឲ្យយើងនៅក្នុងទីផ្សារ របស់ពួកគេ យើងនឹងកាត់បន្ថយ ឬដកចេញទៅកាន់ទីផ្សារផ្សេង ឲ្យតែយើងអាចស្ថិតស្ថេរ ដើម្បីចិញ្ជឹមបុគ្គលឹករបស់ខ្លួនមានប្រាក់ចំណូល គឺគ្រប់គ្រាន់ហើយ អនាគតដ៏ល្អនឹងមករកយើង»៕
