សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ ឈ្មួញល្មើសនេសាទមួយចំនួន កំពុងតែសប្បាយចិត្តនឹងបំផ្លាញ ធនធានជលផល យ៉ាងចាស់ដៃ ក្រោយពីទទួលភ្លើងខៀវ ពីមន្រ្តីជំនាញនិង សមត្ថកិច្ច បើកដៃឲ្យរកបទល្មើសនេសាទ ។ បទល្មើសទាំងនេះ ស្ថិតនៅក្នុង ភូមិសាស្រ្ត ភូមិសេះស្លាប់ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង ។
ប្រភពពីប្រជាពលរដ្ឋនៅមូលដ្ឋាននោះបានឲ្យដឹងថា បទល្មើសនេសាទជាច្រើន ប្រភេទឈ្មួញកំពុងតែធ្វើសកម្មភាពយ៉ាងចាស់ដៃ ដែលគេសង្កេតឃើញថា គ្មានសមត្ថកិច្ច ឬមន្រ្តីពាក់ព័ន្ធណា អើពើរអំពីករណីនេះទេ អ្នកធ្វើបានចេះតែពីធ្វើទៅ សម្រាប់ប្រជាពលរដ្ឋតូចតាច គ្មានលុយ គ្មានខ្សែ ចេញតែទូក ក៏ត្រូវគេកាក់ជាប់ ទៅណាមិនរួចផង ។
ប្រភពបានឲ្យដឹងទៀតថា បទល្មើសនេសាទ ដែលកំពុងតែធ្វើសកម្មភាពទាំងនោះ មានរបាំង លបសាច់អួនក្រឡាញឹក ប្រវែងរាប់រយម៉ែត្រ ដោយប្រើឧបករណ៍ បរ និងលប រ៉ូយ៉ាល, របាំងសាច់អួនក្រឡាញឹក ព័ទ្ធព្រៃផ្ជិតចាប់ត្រី ប្រវែងរាប់រយម៉ែត្រ ជាច្រើនរបាំង និង មានសម្រាស់រាប់រយដុំទៀត ដែលពួកគេកំពុងចាប់ផ្តើមសម្រុកហ៊ុមចាប់ត្រីយ៉ាងគគ្រឹកគគ្រេង ។
ប្រជាពលរដ្ឋបានឲ្យដឹងទៀតថា បទល្មើសនេសាទក្នុងមួយកន្លែង ឈ្មួញត្រូវចំណាយលុយទៅលើសមត្ថកិច្ច មន្រ្តីជំនាញ មិនក្រោម១០០០ដូល្លារនោះទេ ដើម្បីបិតបាំងភ្នែករបស់សមត្ថកិច្ច ។ ចំណែកឯរបាំងសាច់អួនក្រឡាញឹក ឈ្មួញក៏ត្រូវចំណាយជិតនឹង២០០០ដូល្លារ ដើម្បីធ្វើសកម្មភាពនោះបាន ។
ប្រភពបានឲ្យដឹងទៀតថា បទល្មើសនេសាទ នៅតំបន់នេះមានទាំងរដូវប្រាំងនិងរដូវវស្សា ទោះបីរដូវបិត ឬរដូវបើកនោះទេ គឺមានធ្វើជាប្រចាំ គ្រាន់តែតិចឬច្រើនតែប៉ុណ្ណោះ ។ ឈ្មួញដែលរកស៊ីបទល្មើសមិនមែនចេះតែពីរកនោះទេ មុននឹងចាប់ផ្តើមចេញធ្វើសកម្មភាព ត្រូវទៅជួបឈ្មោះ អៀម អុន ជាមុនសិន។ ព្រោះថា ឈ្មោះអៀម អុននេះ ឆ្លាតខាងរត់ការបទល្មើសនេសាទ ទៅជួបមន្រ្តីជំនាញ សមត្ថកិច្ចគ្រប់ប្រភេទ ។
ពាក់ព័ន្ធនឹងករណីនេះ លោក ឈឹម បាន នាយសង្កាត់រដ្ឋបាលជលផលបរិបូរណ៍បានប្រាប់កាសែតនគរវត្តនៅរសៀលថ្ងៃទី ២៣ ខែមករា ឆ្នាំ២០១៩នេះថា បទល្មើសនេសាទនៅក្នុងភូមិសាស្រ្ត ភូមិសេះស្លាប់ ឃុំឆ្នុកទ្រូ ស្រុកបរិបូរណ៍នេះ ពិតជាមានមែន ព្រោះនេះជារបរបស់ពួកគាត់ ហើយបទល្មើសរបៀបនេះ មិនមែនមានតែក្នុងភូមិសាស្រ្ត របស់លោកទេ ម៉ាខេត្តកំពង់ឆ្នាំងមានទាំងអស់ ។
ដោយឡែកពាក់ព័ន្ធនឹងករណីដែលនិយាយថា មានមន្រ្តីពាក់ព័ន្ធ ទៅនឹងសកម្មភាពបទល្មើសនេះ គឺមិនមែនមានតែជំនាញជលផលមួយនោះទេ គឺមានស្ថាប័នជាច្រើនទៀត ដូចជាប៉ូលីស នគរបាលសេដ្ឋកិច្ច និង អង្គភាពផ្សេងៗទៀត ។
ពាក់ព័ន្ធនឹងករណីបទល្មើសនេសាទនេះ លោក លី ឡា នាយខ័ណ្ឌរដ្ឋបាលជលផលកំពង់ឆ្នាំង ដែលទើបនឹងទទួលតំណែងថ្មីៗមកនេះ មិនអាចទាក់ទងសុំការបំភ្លឺបាននោះទេ ដោយសារខលទៅអត់លើកទូរស័ព្ទ ៕
