សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ បុរស២នាក់ ត្រូវបានប៉ូលិសស្រុកចុងកាល់ ឃាត់ខ្លួនកាលពីថ្ងៃទី២៣ មករា ២០១៩ ។ ហេតុការណ៍នេះ កើតឡើងនៅតាមបណ្តោយផ្លូវជាតិលេច៦៨ ស្ថិតនៅក្នុងភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ ។
ជនសង្ស័យទាំង២នាក់ ដែលសមត្តកិច្ចឃាត់ខ្លួនឈ្មោះ ហូ មករា ហៅអាម៉ី ភេទប្រុស អាយុ២៣ឆ្នាំ រស់នៅភូមិតាវ៉ូង ឃុំពន្លៃ ស្រុកភ្នំស្រុក ខេត្តបន្ទាយមានជ័យ និងម្នាក់ទៀត ឈ្មោះឆេង ឆៃណា ភេទប្រុស អាយុ ២៥ឆ្នាំ រស់នៅភូមិចំការ ចេក សង្កាត់អូរស្មាច់ ក្រុងសំរោង ខេត្តឧត្តរមានជ័យ ។ ពួកគេបានធ្វើសកម្មភាពកាច់សោក ម៉ូតូពីជនរងគ្រោះឈ្មោះ ម៉ាន់ រ៉ាម៉ន ភេទប្រុស អាយុ៣៣ឆ្នាំ រស់នៅភូមិដងទុង សង្កាត់កូនគ្រៀល ក្រុងសំរោង មុខរបរជាកម្មករសំណង់ជាមួយគ្នា នៅក្នុងសង្កាត់អូរស្មាច់ ។
ប៉ូលិសស្រុកចុងកាល់បានឲ្យដឹងថា មុនពេលឃាត់ខ្លួនជនសង្ស័យទាំង២នាក់នេះ ប៉ូលិសផ្នែកចរាចរណ៍ស្រុកចុងកាល់បានចុះអនុវត្តច្បាប់ចរាចរណ៍ផ្លូវគោក ដែលស្ថិតនៅចំណុចភូមិជើងទៀន ឃុំជើងទៀន ហើយបានធ្វើកាត្រួតពិនិត្យម៉ូតូជាច្រើនគ្រឿង ប៉ុន្តែសម្រាប់ជនសង្ស័យ ដោយបណ្ដើម៉ូតូប៉ូលិសពុំបានឃាត់ទេ ដោយគ្រាន់តែហៅសួរនាំ ។
ប៉ូលិសបានបន្តថា យោងទៅតាមការសាកសួរជនសង្ស័យ បានសារភាពថា ខ្លួនពិតជាបានកាច់សោកម៉ូតូពីជនរងគ្រោះខាងលើពិតប្រាកដមែន យោងទៅលើវត្ថុតាងសមត្តកិច្ចបានកសាងសំណុំរឿង ជនទាំងពីរនាក់ទៅស្នងការដ្ឋាននគបាលខេត្តឧត្តរមានជ័យ ដើម្បីចាត់ការបន្តទៅតាមច្បាប់៕ ប៉ែន នួន
