សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ កាលពី វេលាម៉ោង ២១:១០នាទីយប់ ថ្ងៃទី៩ ខែកុម្ភៈ ឆ្នាំ២០១៩ មានគ្រោះថ្នាក់ចរាចរណ៍មួយករណីលើផ្លូវជាតិលេខ៤ ចន្លោះគីឡូម៉ែត្រ ១៩៧-១៩៨ ស្ថិតនៅក្នុងភូមិអូរឧញ្ញ៉ាហេង ឃុំអូរឧញ្ញ៉ាហេង ស្រុកព្រៃនប់ ខេត្តព្រះសីហនុ បណ្តាលឲ្យមានអ្នកស្លាប់ និងរបួសធ្ងន់។
សមត្ថកិច្ចបញ្ជាក់ថា ហេតុការណ៍បានកើតឡើង រវាង រថយន្តធំ ០១គ្រឿងម៉ាក HYUNDAI ពាក់ស្លាកលេខព្រះសីហនុ៣A-១៥៤៧ (អ្នកបើកបរមិនស្គាល់អត្តសញ្ញាណ ) មានទិសដៅពីភ្នំពេញ ឆ្ពោះមក ខេត្តព្រះសីហនុ លុះដល់ចំណុចខាងលើរថយន្តបត់ឆ្វេងឆ្លងកាត់ផ្លូវ ជ្រុលទៅបុកម៉ូតូ ០១គ្រឿងទិសដៅស្របគ្នា ម៉ូតូម៉ាក EXCITER គ្មានស្លាកលេខ បើកបរដោយឈ្មោះ ទី សៀអ៉ីថា ភេទ ប្រុស អាយុ ១៩ឆ្នាំ មុខរបរ ជាងមាស មានទីលំនៅភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ មានអ្នករួមដំណើរម្នាក់ឈ្មោះ ធី ចន្ទ្រា ភេទ ប្រុស អាយុ ១៧ឆ្នាំ មុខរបរ កម្មករ មានទីលំនៅភូមិបត់គគីរ ឃុំអូរឧញ្ញ៉ាហេង ស្រុកព្រៃនប់ ខេត្តព្រះសីហនុ ។
ប្រភពបន្តថា គ្រោះថ្នាក់នេះបណ្ដាលឲ្យ ឈ្មោះ ទី សៀអ៉ីថា អ្នកបើកបរម៉ូតូ ស្លាប់នៅនឹងកន្លែងកើតហេតុ និង ឈ្មោះ ធី ចន្ទ្រា អ្នករួមដំណើរលើម៉ូតូ រងរបួស ធ្ងន់។
ចំណែកអ្នកបើកបររថយន្តរត់គេចខ្លួនបាត់ក្រោយពេលកើតហេតុ។
វត្ថុតាង រថយន្ត និង ម៉ូតូ បានយកមករក្សាទុកនៅអធិការដ្ឋាននគរបាលស្រុកព្រៃនប់ ៕ ឆ្លាម សមុទ្រ
