សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ម្ចាស់ពាន The Voice Kid Cambodia រដូវកាលទី២ ទេព ពិសិដ្ឋ នៅមិនទាន់បានបង្ហើសំនៀងក្នុងបទចម្រៀងថ្មីផ្ទាល់ខ្លួននៅឡើយទេក្រោយពីលើកពានជាច្រើនខែ។ ទោះជាយ៉ាងណា តារាពន្លកថ្មីរូបនេះបានលេចមុខក្នុងការសម្តែងបទចម្រៀងថ្មីកំពុងពេញនិយមរបស់ម្ចាស់ពាន Cambodian Idol រដូវកាលទី២លោក គ្រី ថៃពៅ ទៅវិញ។
បទចម្រៀង ស្រលាញ់គេហើយមែនទេ របស់ គ្រី ថៃពៅ ទទួលបានការគាំទ្រខ្លាំងពីក្រុមយុវវ័យកន្លងមក ហើយទើបនឹងបញ្ចេញស្នាដៃ MV សម្រាប់ទស្សនិកជន។ ក្នុងបទចម្រៀងដែលទទួលបានការគាំទ្រខ្លាំងនេះគេសង្កេតឃើញវត្តមាន តារាចម្រៀងវ័យក្មេង ទេព ពិសិដ្ឋចូលរួមសម្តែង រួមជាមួយតារាសម្តែង អាង សុជាតា ហៅឈូឈូ ដែលជាដៃគូសម្តែងសមខ្លាំងនោះ។ មានអ្នកចូលទស្សនាបទចម្រៀងនេះរាប់សែននាក់រួចមកហើយក្រោយពីផលិតកម្មហង្សមាសបានបញ្ចេញជាមួយនឹងការសរសើរថាមិនត្រឹមតែជាការច្រៀងដ៏ពិរោះទេ ប៉ុន្តែសូម្បីតែការសម្តែងក៏មានអត្ថន័យមនោសញ្ចេតនាស៊ីជម្រៅ ចាក់ចំបេះដូងអ្នកគាំទ្រពិសេសក្រុមយុវវ័យ។
មានការសរសើរច្រើនពីទស្សនិកជនក្នុងការលេចមុខតារាចម្រៀងវ័យ១៤ឆ្នាំរូបនេះមកសម្តែងក្នុងបទចម្រៀង ហើយពួកគេចង់ស្តាប់ ការបង្ហើសំនៀងដោយផ្ទាល់នៅក្នុងបទចម្រៀងផ្ទាល់ខ្លួនរបស់ម្ចាស់ពានរូបនេះផងដែរ។ ទស្សនិកជនរំពឹងថាពួកគេនឹងបានស្តាប់ បានឃើញការសម្តែង បទចម្រៀងផ្ទាល់ខ្លួនរបស់ ទេព ពិសិដ្ឋដែលនឹងចេញនៅពេលឆាប់ៗខាងមុខផងដែរ។ ខណៈដែលម្ចាស់ពានរដូវកាលទី១ កុមារាពេជ្រ ថៃ ធ្លាប់បានបញ្ចេញស្នាដៃសម្តែង និងបង្ហើរសំនៀងក្នុងបទចម្រៀងផ្ទាល់ខ្លួនរួចមកហើយ។
គួរបញ្ជាក់ដែរថាទេព ពិសិដ្ឋ ដែលជាបេក្ខជនមកពីខេត្តសៀមរាប បានក្លាយជាម្ចាស់ពានកម្មវិធី The Voice Kids Cambodia រដូវកាលទី២ បន្ទាប់ពីគេទទួលបានសំឡេងគាំទ្រច្រើនជាងបេក្ខជន៥រូបទៀត ក្នុងការប្រកួតផ្តាច់ព្រ័ត្រដែលរៀបចំដោយទូរទស្សន៍ហង្សមាសកាលពីអំឡុងខែវិច្ឆិកាឆ្នាំ២០១៨។ ក្រោយឈ្នះការប្រកួត ពិសិដ្ឋ ទទួលបានប្រាក់រង្វាន់១០០លានរៀល ការចុះកុងត្រាជាមួយផលិតកម្មហង្សមាស ហើយបានក្លាយជាម្ចាស់ពាន The Kids Cambodia បន្ទាប់ពី ពេជ្រ ថៃ ៕ វឌ្ឍនា
