សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្នូរសំឡេងលាន់លឺដូចរន្ទះ ខណៈដែលរថយន្តដឹកដីមួយគ្រឿង បានបើកបុករះរថយន្តជាច្រើនគ្រឿង ខណៈកំពុងតែឈប់ភ្លើងស្តុបពណ៌ក្រហម ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១០និង១៥នាទីព្រឹក ថ្ងៃទី៨ ខែមីនា ឆ្នាំ២០១៩ ស្ថិតនៅចំផ្លូវបំបែកស្តុបបំបែកកប់ស្រូវ ភូមិអន្លងក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញមានរថយន្តជាច្រើនកំពុងធ្វើចរាចរណ៍ ទិសដៅពីលិចទៅកើត ខណៈភ្លើងស្តុបពណ៌ក្រហមរថយន្តប្រហែលជា៧គ្រឿង បានឈប់ត្រង់ចំណុចភ្លើងស្តុបកើតហេតុខាងលើ ស្របពេលនោះ ក៏មានរថយន្តបែនដឹកដីមួយគ្រឿងទៀត ម៉ាក HINO ពណ៌បែតងពាក់ស្លាកលេខ ភ្នំពេញ3A -4828 បើកស្របទិសដៅគ្នាក្នុងល្បឿនយ៉ាងលឿន លុះដល់ចំណុចកើតហេតុជាន់ហ្រ្វាំងមិនស៊ី បានជ្រុលចង្កូតបុករះរថយន្តដែលឈប់នៅខាងមុខគៀបរុញចូលគ្នារងការខូចខាតរថយន្តចំនួន៦គ្រឿង។
ចំណែកអ្នកបើកបររថយន្តបង្កបើកទ្វាររថយន្តបំរុង នឹងរត់គេចខ្លួន ត្រូវបានប្រជាពលរដ្ឋឃាត់ប្រគល់ឲ្យសមត្ថកិច្ច ដោយសមត្ថកិច្ចភ្លេចវាយខ្នោះ អ្នកបើកបរខាងលើ បានរត់គេចខ្លួនបាត់ដដែល ។
ក្រោយពេលកើតហេតុ សមត្ថកិច្ចចរាចរណ៍ខណ្ឌសែនសុខសហការជាមួយកម្លាំង ជំនាញចរាចរណ៍ក្រុងបានចុះមកវាស់វែងនៅកន្លែងកើតហេតុ បន្ទាប់ពីវាស់វែងរួចសមត្ថកិច្ចក៏ស្ទូចយករថយន្តទាំង៦គ្រឿង ទៅរក្សាទុកនៅការិយាល័យចរាចរណ៍ជើងគោកស្នងការនគរបាលរាជធានីភ្នំពេញ ដើម្បីរក្សាទុកដោះស្រាយគ្នានៅពេលក្រោយ ៕ តុង សីហា
