សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីប្រជាពលរដ្ឋដែលកំពុងតែដេកលង់លក់ក្នុងដំណេក ស្រាប់តែភ្ញាក់ព្រឺតរត់ចែកជើងគ្នា ខណៈដែលមានករណីផ្ទុះធុងហ្គាសលាន់ដូចរន្ទះ នៅក្នុងហាងកាហ្វេយីហោGreen Coffee ប៉ុន្តែសំណាងល្អមិនបង្កឲ្យឆាបឆេះនោះទេ ។
ករណីផ្ទុះធុងហ្គាស ខាងលើនេះ បានកើតឡើងកាលពីវេលាម៉ោង៤ និង៣០នាទីទៀបភ្លឺថ្ងៃសុក្រ ៣កើត ខែផល្គុន ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី៨ ខែមីនា ឆ្នាំ២០១៩ ម្ដុំស្តុបលូ៥ ស្ថិតក្នុងភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញទីតាំងខាងលើនេះ បិទទ្វាឈប់លក់ លុះដល់ម៉ោង៤ និង៣០នាទីទៀបភ្លឺស្រាប់តែលឺសូរសម្លេងផ្ទុះដូចគ្រាប់បែក ធ្វើឲ្យអ្នកជិតខាងរស់នៅក្បែរនោះនាំគ្នាភ្ញាក់ទាំងកំរោល ដោយអ្នកខ្លះបានទាញទុយោទឹក ខ្លះយកបំពង់ពន្លតអគ្គិភ័យតាមផ្ទះត្រៀមបាញ់ពន្លត និងរាយការណ៍ប្រាប់សមត្ថកិច្ចមូលដ្ឋានភ្លាមៗផងដែរ ។ ប៉ុន្តែអគ្គិភ័យខាងលើនេះមិនបង្កឲ្យមានភ្លើងឆាបឆេះនោះទេ គ្រាន់តែឃើញមានផ្សែងហ៊ុយបន្តិចប៉ុណ្ណោះ ។
ក្នុងហេតុការណ៍នោះដែរ គេឃើញមានប្រជាពលរដ្ឋខ្លះភ័យខ្លាចភ្លើងឆេះខ្លាំង ក៏នាំគ្នារើឥវ៉ាន់ចេញផងដែរ ហើយសមត្ថកិច្ចចុះជួយធ្វើអន្តរាគមន៍ដល់ទីតាំងកើតហេតុភ្លាមៗ ។ ក្រោយកើតហេតុម្ចាស់ទីតាំងបានបើកទ្វារចេញមកក្រៅ ប្រាប់សមត្ថកិច្ចថាកំប៉ុងហ្គាសតូចតែប៉ុណ្ណោះ ៕ស រស្មី
