សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានគ្រោះអគ្គិភ័យមួយបានឆេះផ្ទះប្រជាពលរដ្ឋអស់ចំនួន២ខ្នង និងខ្ទមកម្មករសំណង់មួយក្បែរគ្នាអស់ទាំងស្រុង បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះជួយអន្តារាគមន៍ កាលពីវេលាម៉ោង៣ និង១០នាទីទៀបភ្លឺ ឈានចូលថ្ងៃទី១១ ខែមីនា ឆ្នាំ២០១៩ ស្ថិតនៅតាមបណ្ដោយផ្លូវបេតុង ក្នុងភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
យោងតាមប្រភពពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញ មានផ្សែហុយចេញក្នុងផ្ទះរងគ្រោះខាងលើ ហើយប្រជាពលរដ្ឋក៏មាន ការភ្ញាក់ផ្អើល ខ្លះរត់ទៅជួយយកបំពងពន្លត់ អគ្គិភ័យមកបាញ់ពន្លត់ ខ្លះទៀតទាក់ទងទៅសមត្ថកិច្ច មូលដ្ឋានឲ្យជួយអន្តរាមន៍ផងដែរ ។ ក្នុងគ្រានោះ គេក៏ឃើញមានអណ្ដាត ភ្លើងឆេះឡើងខ្មួលខ្មាញ់ ទោះបីយកបំពងពន្លត់អគ្គិភ័យ និងយកទឹកជះយ៉ាងណាក៏មិន អាចគ្រប់គ្រងស្ថានភាពបាន ទេ ។
ក្រោយមក គេឃើញមានរថយន្តពន្លត់ អគ្គិភ័យបានមកជួយបាញ់ពន្លត់ជាបណ្ដើរៗ រហូតរថយន្តពន្លត់អគ្គិភ័យ បានមកដល់ចំនួន៦គ្រឿង តែប្រើប្រាស់អស់តែ៥គ្រឿងប៉ុណ្ដោះ ក៏រលត់ទៅវិញស្ថាពរ ។
ជាមួយគ្នានោះ ផ្ទះឈើប្រក់សង្ក័រចំនួន២ខ្នង ដែលមានទ្រព្យសម្បត្តិមួយចំនួន ក្នុងផ្ទះក៏ត្រូវភ្លើងឆេះម៉ត់ រួមជាមួយខ្ទមកម្មករសំណង់ ក្បែរគ្នា ក៏ត្រូវបានអគ្គិភ័យឆាប់ឆេះ ទាំងស្រុងផងដែរ តែក្នុងករណីខាងលើនេះ ក៏មិនបង្កឲ្យមនុស្សរងរបួសនោះឡើយ ៕ ភារ៉ា ដង្កោ
