សារព័ត៌មាន នគរវត្ត តែងតែនាំមុខគេជានិច្ច
ក្នុងនាមនាងខ្ញុំជាប្រជាពលរដ្ឋនៅក្រុងព្រះសីហនុ ចេះតែឆ្ងល់ថ្នាក់ដឹកនាំខេត្ត ស្រែករកទឹកដើម្បីជួយសង្គ្រោះប្រជាពលរដ្ឋ នៅគ្រាដែលគេដឹងថា ប្រភពទឹកស្អាតនៅក្នុងទីក្រុងនេះ ត្រូវបានថ្នាក់ដឹកនាំខេត្តឃុបឃិតជាមួយស្ថាប័នជំនាញលក់ឲ្យគេទៅហើយនោះ ។ បឹងព្រែកទប់ ជាប្រភពទឹកស្អាតដ៏សំខាន់មួយសម្រាប់ប្រជាពលរដ្ឋនៅក្រុងព្រះសីហនុ ។ ប៉ុន្តែឥឡូវនេះ ទាំងអ្នកមានអំណាច ទាំងអ្នកមានលុយ អង្កន់បឹងព្រែកទប់ចែកគ្នាអស់ទៅហើយ ។ គ្មានក្រុមហ៊ុនណាអាចសង្គ្រោះទាន់ពេលវេលាសម្រាបហានិភ័យដែលកើតឡើងភ្លាមៗនេះបានទេ ។ នៅរដូវប្រាំងដែលកើនកម្តៅថែមទៀតនេះ គេជឿថា ខេត្តព្រះសីហនុ ប្រឈមនឹងកង្វះទឹកកាន់តែខ្លាំងឡើងថែមទៀត ។
នាងខ្ញុំបានឃើញថ្នាក់ដឹកនាំខេត្តព្រះសីហនុ ដើរត្រេងត្រាងមើលស្ថានីយបូមទឺកមួយចំនួន ហើយបាន«ជំរុញ» ឲ្យក្រុមហ៊ុនពន្លឿនគ្រប់សកម្មភាពក្នុងការផ្តល់ទឹកជូនប្រជាពលរដ្ឋឲ្យបានគ្រប់គ្រាន់ ។ ខាងក្រុមហ៊ុនក៏បានឆ្លើយ«យេស» ប៉ុន្តែមិនបានសន្យាថា ថ្ងៃនេះ ឬថ្ងៃស្អែកនោះដែរ ។ ដូច្នេះ គ្មានភាពប្រាកដប្រជា សម្រាប់ឲ្យយើងខ្ញុំជាប្រជាពលរដ្ឋនៅក្រុងព្រះសីហនុ ថា នឹងមានទឹកប្រើប្រាស់ក្នុងពេលវេលាប្រាកដប្រជាណាមួយនៅឡើយ ។ បើទឹកប្រើប្រាស់ ងួតផឹក គ្មានផង តើមានទឹកឯណាសម្រាប់ប្រើប្រាស់បំពេញសេចក្តីត្រូវការសម្រាប់ការងារសំណង់ ឬការអភិវឌ្ឍអ្វីផ្សេងៗនោះ ។ អាជ្ញាធរខេត្ត គួរប្រើស្មារតី និងការគិតគូរឲ្យបានគ្រប់ជ្រុងជ្រោយអំពីបញ្ហាទឹកនេះ ពីព្រោះថា វានឹងមានហានិភ័យខ្ពស់ ។ សូម្បីតែភ្ញៀវទេសចរណ៍ក៏មិនអាចទៅកម្សាន្តនៅទីកន្លែងដែលគ្មានទឹកប្រើប្រាស់នោះដែរ ។
ថ្នាក់ដឹកនាំក្រុង-ខេត្តព្រះសីហនុដឹងច្បាស់ណាស់អំពីមូលហេតុដែលបណ្តាលឲ្យខ្វះខាតទឹកនៅពេលដែលរដូវប្រាំងទើបតែចាប់ផ្តើម ។ ប៉ុន្តែគ្មាននរណាហ៊ាននិយាយអំពីបញ្ហានេះឲ្យចំនោះទេ ។ ផ្ទុយទៅវិញ គឺគេដឹងគ្រប់គ្នាថា បឹងព្រែកទប់ ដែលជាប្រភពទឹកស្អាត ត្រូវបានគេចែករំលែកអស់ទៅហើយ ។ នៅពេលដែលបញ្ហានេះកើតឡើង ថ្នាក់ដឹកនាំខេត្តព្រះសីហនុបាននិយាយថា បឹងព្រែកទប់ លែងជាប្រភពទឹកស្អាតសម្រាប់អ្នកក្រុងព្រះសីហនុទៀតហើយ ។ ប៉ុន្តែប្រសិនបើបឹងព្រែកទប់មិនទាន់ត្រូវបានគេយកទៅបុះចែកផលប្រយោជន៍ទេនោះ ប្រជាពលរដ្ឋនៅក្រុងព្រះសីហនុយើងខ្ញុំ ក៏មិទាន់រងនូវហានិភ័យដូចថ្ងៃនេះដែរ ៕ ប្រជាពលរដ្ឋម្នាក់
