សារព័ត៌មាន នគរវត្ត តែងតែនាំមុខគេជានិច្ច
ក្នុងរយៈពេលប៉ុន្មានថ្ងៃចុងក្រោយនេះ នាយជាលបានកត់សម្គាល់ឃើញថា មានពលរដ្ឋមួយចំនួន ផ្អើលនាំគ្នាទិញពងមាន់ ពងទា ទុកសម្រាប់ហូប និងខ្លះទៀតធ្វើទីងមោងដាក់នៅមុខផ្ទះព្រមទាំងប្រមូលផ្តុំគ្នាដុតភ្នក់ភ្លើង ដោយមានជំនឿមិនសមហេតុសមផលថាការពារកុំឲ្យឆ្លងកូវីដ-១៩ ។ មិនតែប៉ុណ្ណោះនៅតាមភូមិ ឃុំ ស្រុក ក្នុងខេត្តខ្លះ មានជំនឿថាការនិងសូត្រមន្តតាមផ្ទះក៏អាចនឹងបណ្តេញឧបទ្រពចង្រៃ ជាពិសេសជំងឺអាសន្នរោគ ដូចជា ជំងឺកូវីដ-១៩ ជាដើម ផងដែរ ។
នាយជាលគិតថា ការនាំគ្នា ទិញពងមាន់ទៅហូបជាទង្វើដែលនាំឲ្យសង្គមមានភាពចលាចល និងនាំឲ្យខាតបង់ថវិកាទៅវិញទេ។ នាយជាលមិនដែលឮទេ វាជាពាក្យចចាមអារ៉ាមផ្តេសផ្តាស ហើយម្យ៉ាងទៀតវាជាការចាញ់បោកអ្នកលក់ពងមានពងទាដែលចង់ឲ្យរបស់ខ្លួនលក់ដាច់ទៅវិញទេ។
ចំណែកការដាក់ទីងមោងនៅមុខផ្ទះ ការដុតភ្លើង និង ការសូត្រមន្តនោះជាជំនឿដែលពលរដ្ឋគោរព និងអនុវត្តតាមដូនតាពីបុរាណដោយជឿថានឹងធ្វើឲ្យចិត្តមនុស្សដែលមានភាពភ័យខ្លាចលែងភ័យព្រួយមានជាយូរមកហើយ ហើយជំនឿទាំងនេះខ្លះអាចឲ្យអប់រំផ្លូវចិត្តរបស់ពូកគេឲ្យរំងាប់នូវភាពភ័យខ្លាចបានមួយចំណែកដែរ។ ក៏ប៉ុន្តែជំនឿក៏ត្រូវតែមានហេតុផលឲ្យសមរម្យដែរ ក្នុងនោះដូចជាជំនឿដុតភ្លើងនៅមុខផ្ទះ ប្រសិនជាមានឧបទ្ទវហេតុខ្យល់បក់កម្ទេចភ្លើងហើរទៅលើដំបូលផ្ទះប្រក់ស្លឹកឆេះផ្ទះ ឬឆេះព្រៃវិញតើយ៉ាងណា ?
នាយជាលគិតថា អ្វីដែលសំខាន់ដើម្បីជៀសវាងកុំឲ្យខាតបង់ថវិកា ឬទ្រព្យសម្បត្តិ និងទប់ស្កាត់ជំងឺកូវីដ-១៩បាននោះ ត្រូវនាំគ្នាអនុវត្តអនាម័យតាមការណែនាំរបស់ក្រសូងសុខាភិបាលវិញប្រសើរជាង ។ ជាមួយគ្នានេះដែរសូមយកចិត្តទុកដាក់ជាមួយប្រមុខរដ្ឋាភិបាល ដែលបានប្រកាសរួចហើយថា នឹងមិនបិទផ្សារទេសូមប្រជាពលរដ្ឋកុំចេញពីផ្ទះ បើមិនមានការចាំបាច់ ហើយត្រូវពាក់ម៉ាស់ឬប្រើក្រមារខ្មែរយើងផង ។ ឈប់ជឿជំនឿគ្មានសមហេតុផលដូចជា ហូបពងមាន់ ពងទា អាចចៀសផុតជំងឺកូវីដ-១៩ ទៀតទៅ ៕ នាយជាល
