សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍គ្រោះថ្នាក់ចរាចរណ៍ ដ៏រន្ធត់មួយបង្កឡើងដោយរថយន្តកូរ៉េឃ្លុប ចំណុះ៣តោនមួយគ្រឿង លឿនជ្រុល ចាប់ហ្វ្រាំងមិនជាប់ បុករះរថយន្តចំនួន៥គ្រឿង និងម៉ូតូកង់បីមួយគ្រឿងរុញគៀបជាប់គ្នា ក្នុងដំណើរស្របទិស បង្កឲ្យកកស្ទះយ៉ាងខ្លាំង ។
ហេតុការណ៍នេះ បានកើតឡើងកាលពីវេលាម៉ោង៩និង៤០នាទីព្រឹក ថ្ងៃទី១២ ខែមីនា ឆ្នាំ២០១៩ ត្រង់ចំណុចភ្លើងស្តុប ផ្លូវវេងស្រេង កែងផ្លូវទួលពង្រ ភូមិត្រពាំងថ្លឹង សង្កាត់ចោមចៅ១ ខណ្ឌពោធិសែនជ័យ រាជធានីភ្នំពេញ ។
តាមប្រភពបានឲ្យដឹងថា មុនកើតហេតុ រថយន្តបង្កម៉ាក ហុីយ៉ាន់ដាយ ឃ្លុប ចំណុះ៣តោន ពណ៌ស ពាក់ស្លាកលេខ ភ្នំពេញ 3C-1380 ជារថយន្ត របស់ក្រុមហ៊ុនដឹកក្រដាស់ បើកល្បឿនលឿន ពីកើតទៅលិច លុះដល់ចំណុចកើតហេតុ បានបុករថយន្តសាំយ៉ុង ពណ៌ស ពាក់ស្លាកលេខ ភ្នំពេញ 2AB-5024 ខ្ទេចគូទក្រោយ ហើយរេទៅបុករុញរថយន្ត កូរ៉េ ឃ្លុប ម៉ាក Bongo ពណ៌ស ពាក់ស្លាកលេខ ភ្នំពេញ 2AC-3131 ទៅផ្ទប់ជាមួយរថយន្ត ស្ទូច ម៉ាក ហុីយ៉ាន់ដាយ ពណ៌ស ពាក់ស្លាកលេខ ភ្នំពេញ 3E-5918 ហើយរថយន្តបន្តកៀរ ម៉ូតូកង់បីមួយគ្រឿង ពណ៌ស ពាក់ស្លាកលេខ ភ្នំពេញ 1HE-2421 រងខូចខាតខ្ទេចគូទក្រោយ រុញទៅឡើងខឿនចិញ្ចើមផ្លូវ ហើយហេតុការណ៍ដែលរថយន្តបង្កបើកបុករុញ រថយន្តសាំយ៉ុងនោះ បានរុញបន្តទៅបុក រថយន្តហុីយ៉ាន់ដាយ ប្រភេទ ទំនើបមួយគ្រឿង ដែលបើកខាងមុខគេ តែខូចខាតបន្តិចបន្តួច មិនបាននៅទាមទាររកសំណងឡើយ បន្តដំណើរចាកចេញទៅបាត់ បន្សល់ទុកតែរថយន្តចំនួន៤គ្រឿង និងម៉ូតូកង់បីមួយគ្រឿង នៅកន្លែងកើតហេតុ ។
ហេតុការណ៍ខាងលើបង្កឲ្យកកស្ទះចរាចរណ៍ ហើយត្រូវបានសមត្ថកិច្ច ចុះទៅសម្រួលយករថយន្តពាក់ព័ន្ធគ្រោះថ្នាក់ ទៅដាក់កៀនខាង រង់ចាំជំនាញមកវាស់វែង ដើម្បីរកដំណោះស្រាយ តាមច្បាប់ ៕ សុខាសែនជ័យ
