សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យចំនួន២នាក់ បានធ្វើសកម្មភាពឆក់ទូរស័ព្ទពីនារី២នាក់ ខណៈកំពុងជិះម៉ូតូបានសម្រេចនៅចំណុចស្តុបផ្សារព្រៃទា តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ ហើយព្យាយាមគេចខ្លួនរហូតមកដល់ចំណុចច្រកចូលផ្សារតាំងកសាង សង្កាត់កាកាបទី២ ក៏ត្រូវប្រជាពលរដ្ឋដេញចាប់បានប្រគល់ឲ្យសមត្ថកិច្ច កាលពីវេលាម៉ោង១និង៣០នាទីរសៀល ថ្ងៃទី១៣ ខែមីនា ឆ្នាំ២០១៩ ។
ជនសង្ស័យទី១ ឈ្មោះ ឌិន សំអូន ហៅវី ភេទប្រុស អាយុ១៨ ឆ្នាំ មុនរបរមិនពិតប្រាកដ ស្នាក់នៅភូមិក្រាំងពង្រ ឃុំបសរ ស្រុកសំរោងទង ខេត្តកំពង់ស្ពឺ ។ ទី២ឈ្មោះខុន សៀងហួត ភេទប្រុស អាយុ១៨ ឆ្នាំ មុខរបរជាងចាក់សាក់ ស្នាក់នៅខេត្តជាមួយគ្នា។
តាមសាក្សីបានឲ្យដឹងថា មុនពេលកើតហេតុគេបានឃើញក្មេងស្រី២នាក់ជិះម៉ូតូម៉ាក nex ពណ៌ស ពាក់ស្លាកលេខភ្នំពេញ1FN 4425 ធ្វើដំណើរតាមបណ្តោយផ្លូវមហាវិថីសហព័ន្ធរុស្ស៊ី ក្នុងទិសដៅពីលិចទៅកើតដោយបានដាក់ទូរស័ព្ទនៅក្នុងឃ្លប់មុខ ខណៈមកដល់ចំណុចកើតហេតុស្រាប់តែមានជនសង្ស័យចំនួន២នាក់ ជិះម៉ូតូម៉ាកហុងដាឌ្រីមសង់ ពណ៌ខ្មៅ ពាក់ស្លាកលេខកណ្តាល 1G 8125 ធ្វើសកម្មភាពឆក់ទូរស័ព្ទបានសម្រេចបណ្តាលឲ្យជនរងគ្រោះរងរបួស ហើយព្យាយាមជិះគេចខ្លួនតែត្រូវបានប្រជាពលរដ្ឋដេញចាប់បានភ្លាមៗតែម្តង ។
ក្រោយពេលកើតហេតុជនសង្ស័យត្រូវបានសមត្ថកិច្ចនាំទៅប៉ុស្តិ៍រដ្ឋបាលកាកាទី២ដើម្បី សាកសួរកសាងសំណុំរឿងបញ្ជូនទៅអធិការចាត់ការបន្ត ៕ សុខាសែនជ័យ
