សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការស្រែកផ្អើលឆោឡោ ពីសំណាក់អ្នកភូមិ និងរាយការណ៍ មកសមត្ថកិច្ចមូលដ្ឋានភ្លាមៗ ខណៈប្រទះឃើញសពស្ត្រីវិកលចរិកម្នាក់ ដេកស្លាប់ នៅឯវាលស្រែ ទំនងដាច់អាហារ ។
ហេតុការណ៍នេះ បានកើតឡើងកាលពីវេលាម៉ោង៧ព្រឹក ថ្ងៃចន្ទ ៥រោច ខែផល្គុន ឆ្នាំច ព.ស ២៥៦២ ត្រូវនឹងទី២៥ ខែមីនា ឆ្នាំ២០១៩ ត្រង់ចំណុចវាលស្រែភូមិលក្ខ័រាជា ឃុំកពង់ចក ស្រុករំដួល ខេត្តស្វាយរៀង ។
យោងតាមសមត្ថកិច្ចនគរបាលស្រុកបានឲ្យដឹងថា មុនដំបូង មានប្រជាពលរដ្ឋឈ្មោះ សន រតនៈ ភេទប្រុស អាយុ២៦ ឆ្នាំរស់នៅភូមិលក្ខ័រាជា ឃុំកពង់ចក ស្រុករំដួល ខេត្តស្វាយរៀង បានប្រទះឃើញសាកសពស្ត្រីម្នាក់ ដេកស្លាប់នៅវាលស្រែភូមិ ឃុំខាងលើ រួចក៏បានរាយការណ៍មកសមត្ថកិច្ចមូលដ្ឋានភ្លាមៗ ។
ប្រភពបន្តថា បន្ទាប់ពីទទួលបានព័ត៌មានភ្លាម សមត្ថកិច្ចបានសហការជាមួយគ្រូពេទ្យ នៃមណ្ឌលសុខភាពកំពង់ចកចុះពិនិត្យដល់កន្លែងកើតហេតុ ជាបឋមពិនិត្យឃើញថា សាកសពមិនត្រូវស្គាល់អត្តសញ្ញាណ ភេទស្រី អាយុប្រហែល៥០ឆ្នាំ ខណៈសពមានសភាពធុំក្លិនប្រហែលស្លាប់ជាច្រើនថ្ងៃមកហើយ ។
យោងតាមប្រជាពលរដ្ឋម្នាក់បានឲ្យដឹងថា កាលពីថ្ងៃទី២០ ខែមីនា ឆ្នាំ២០១៩ វេលាម៉ោង៨ និង៣០នាទីព្រឹក គាត់ឃើញមានមនុស្សស្រីម្នាក់ដើរស្រាត បន្ទាប់មក ក៏ត្រូវបានអ្នកភូមិដែលមានទីលំនៅភូមិ ឃុំ កើតហេតុ ក៏បានយកខោត្រឹមជង្គង់ ពណ៌ប្រផេះឲ្យស្លៀក ព្រោះខ្លួនជាស្រីមិនឲ្យខ្មាស់គេ និងឲ្យអាហារហូបផងដែរ ។
ប្រភពបន្តថា លុះនៅព្រឹកថ្ងៃទី២៥ ខែមីនា ឆ្នាំ២០១៩ ស្រាប់តែអ្នកភូមិប្រទះឃើញដេកស្លាប់នៅឯវាលស្រែបង្កការភ្ញាក់ផ្អើលតែម្ដង។
បច្ចុប្បន្ន សាកសពត្រូវបានសមត្ថកិច្ចប្រគល់ឲ្យលោកគ្រូអាចារ្យបញ្ចុះដើម្បីស្រាវជ្រាវរកសាច់ញាតិផងដែរ ៕ យឹម សុថាន
