រន្ទះបាញ់មួយគ្រាប់ ស្លាប់បុរសម្នាក់ ខណៈដេញក្របីនៅវាលស្រែ

ខេត្តស្វាយរៀង៖ មានការភ្ញាក់ផ្អើលដល់អ្នកភូមិ និងក្រុមគ្រួសារ ខណៈប្រទះឃើញបុរសម្នាក់បានស្លាប់ កណ្ដាលវាលស្រែ នៅវាលស្រែខាងកើតភូមិ ចម្ងាយ១៥០០ម៉ែត្រ ដោយទៅដេញក្របី នៅវាលស្រែ ពេលមេឃកំពុងភ្លៀង បន្ទាប់ពីមានភ្លៀង និងខ្យល់កន្ត្រាក់លាយឡំ រន្ទះបាញ់មួយកាលពីថ្ងៃទី៣១ ខែមីនា ឆ្នាំ២០១៩ នៅចំណុចភូមិកណ្តាល ឃុំខ្សែត្រ ស្រុកកំពង់រោទិ៍ ខេត្តស្វាយរៀង ។

បើតាមសមត្ថកិច្ចនគរបាលស្រុកបានឲ្យដឹងថា បុរសជនរងគ្រោះ មានឈ្មោះ យុង យីម អាយុ២៨ឆ្នាំ មុខរបរកសិករ មានទីលំនៅភូមិកណ្តាល ឃុំខ្សែត្រ ស្រុកកំពង់រោទិ៍ខេត្តស្វាយរៀង ។

បើតាមអ្នកភូមិបានឲ្យដឹងថា មុនកើតហេតុ ឃើញបុរសខាងលើបានដើរទៅដេញក្របី នៅវាលស្រែ ចម្ងាយប្រមាណ១៥០០ម៉ែត្រ បន្ទាប់ពីមានមេឃងងឹតលាយឡំ និងខ្យល់កន្ត្រាក់ ខណៈនោះស្រាប់តែមានរន្ទះបាញ់កក្រើកដី បណ្ដាលឲ្យអ្នកភូមិម្នាក់ៗ រត់ចូលជ្រកក្រោមផ្ទះគ្រប់ៗគ្នា ។

ប្រភពបន្តថា ក្រោយពីរាំងភ្លៀងមេឃស្រឡះ ស្រាប់តែមានការភ្ញាក់ផ្អើលពីសំណាក់ក្មេងៗ រត់មកប្រាប់ក្រុមគ្រួសារថា បានប្រទះឃើញជនរងគ្រោះដេកស្លាប់កណ្ដាលវាលស្រែ ។

សពត្រូវបានសមត្ថកិច្ចមូលដ្ឋានធ្វើកំណត់ហេតុ និងបានប្រគល់ឲ្យក្រុមគ្រួសារយកមកធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន