សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តស៊េរីទំនើបម៉ាក ឡង់គ្រីស័រ ឡើងថ្មីស្រឡាងមួយគ្រឿង ត្រូវបានរថយន្តកុងទីន័រ បត់គៀរ បណ្ដាលឲ្យរងការខូចខាត ផ្នែកខាងមុខយ៉ាងដំណំ បង្កការកក់ស្ទះចរាចរណ៍ដល់បងប្អូនប្រជាពលរដ្ឋយ៉ាងខ្លាំង កាលពីវេលាម៉ោង៨ និង១០នាទីយប់ ថ្ងៃទី០៩ ខែមេសា ឆ្នាំ២០១៩ នៅតាមបណ្ដោយផ្លូវ៧៤ កែងផ្លូវព្រះស៊ីសុវត្ថិ ក្បែរក្រោមស្ពានជ្រោយចង្វា ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
បើតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញមានរថយន្តកុងទីន័រ ពាក់ស្លាកលេខ ភ្នំពេញ 3A-9972 ដោយកន្ទុយក្រោយពាក់ស្លាកលេខ ភ្នំពេញ 4A-2352 បើកបរដោយបុរសម្នាក់ បានបត់ឆ្វេងមិនប្រយ័ត្នបានកៀររថយន្តស៊ែរីទំនើបម៉ាក ឡង់គ្រីស័រ ពណ៌សពាក់ស្លាកលេខ ភ្នំពេញ 2BB-3885 ទិសដៅពីលិចទៅកើតស្របទិសគ្នា បណ្ដាលឲ្យរថយន្តស៊េរីទំនើបឡង់គ្រីស័ររងការខូចខាតផ្នែកខាងមុខយ៉ាងដំណំ ។
ក្រោយកើតហេតុភ្លាមៗ អ្នកបើករថយន្តកុងតឺន័រ បានបើកទ្វារត់គេចខ្លួនបាត់ស្រមោល ហើយក្នុងហេតុការណ៍នេះដែរ មិនបង្កឲ្យមានអ្នករងរបួសនោះទេ ។
ក្រោយពេលកើតហេតុ សមត្ថកិច្ចមូលដ្ឋានបានទំនាក់ទំនងទៅការិយាល័យជំនាញចរាចរណ៍ផ្លូវគោករាជធានីភ្នំពេញ ដើម្បីចុះមកវាស់វែងយករថយន្តទាំងពីរគ្រឿងទៅរក្សាទុក រង់ចាំការដោះស្រាយពេលក្រោយ ៕ ភារ៉ា ដង្កោ
