សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាចម្រៀងលំដាប់ជួរមុខទាំតារាចម្រៀងយេៗ និងតារាចម្រៀង Original Song ប្រមាណជាង១០នាក់ បានចេញដំណើរពីកម្ពុជា ឆ្ពោះទៅកាន់ទីក្រុងប៊ូសាន ប្រទេសកូរ៉េ ហើយកាលពីរាត្រីថ្ងៃទី ១៨ ខែមេសា ឆ្នាំ២០១៩នេះ ។ ការចេញដំណើរលើកនេះ គឺជាការឧបត្ថម្ភដោយក្រុមហ៊ុនឡេងណាវ៉ាត្រា ប្រយោជន៍បង្កើតឱកាសជួបជុំជាមួយពលករខ្មែររស់នៅប្រទេសកូរ៉េ ពិសេសគឺស្វែងរកមូនិធីជួយដល់មន្ទីរពេទ្យគន្ធបុប្ផាផងដែរ ។
ថ្លែងនៅព្រលានយន្តហោះអន្តរជាតិភ្នំពេញ មុនការចេញដំណើរពីកម្ពុជាតារា ចម្រៀង កញ្ញា ឡូរ៉ាម៉ម បានបញ្ជាក់ថា នាងពិតជារំភើបក្នុងការចេញដំណើរទៅច្រៀងរាំនៅប្រទេសកូរ៉េនេះ ព្រោះតែជាពេលមួយដ៏ល្អ ព្រមគ្នាដែលក្រៅតែពីការជួបជុំកម្សាន្តសប្បាយ ក៏ជាឱកាសមួយរួមគ្នាបង្កើតកំណត់ត្រាក្នុងការរាំចង្វាក់រាំវង់ ពិសេសគឺស្វែងរកមូនិធីជួយដល់គន្ធបុប្ផា ។
នាងថា ជាមោទនភាពដែលជាកូនខ្មែរមានឱកាសជួបជុំជាមួយខ្មែរដូចគ្នា កម្សាន្តសប្បាយ និងចូលរួមសកម្មភាពសង្គម រួមគ្នាផងដែរ ។ នាងថាសិល្បករខ្មែរបានត្រៀមរួចជាស្រេចនូវបទចម្រៀងប្រជាប្រិយខ្មែរ ដ៏សម្បូរបែបដើម្បីរាំលេងកម្សាន្ត ។
ថ្លែងស្រដៀងគ្នានេះដែរ តារាចម្រៀងស្រីល្បីឈ្មោះ កញ្ញា យូរី បានបញ្ជាក់ថា នេះគឺជាលើកទី៣ ដែលនាងមានឱកាសចេញទៅជួបបងប្អូនខ្មែររស់នៅប្រទេសកូរ៉េ ដែលការជួបជុំនេះនឹងធ្វើឡើងនៅថ្ងៃទី២០ខែមេសាខាងមុខនេះ នៅទីក្រុងប៊ូសានផ្ទាល់តែម្តង ។
នាងបញ្ជាក់ថា នាង និងដៃគូលោក B Mo បានត្រៀមរួចជាស្រេចដើម្បីបង្កើត បរិយាកាសសប្បាយរីករាយក្នុងព្រឹត្តិការណ៍ជួបជុំដ៏ធំ និងសប្បាយរីករាយប្រចាំឆ្នាំមួយនេះ ។ អ្វីដែលពិសេសនាងនឹងត្រៀមបទចម្រៀង រាំទយ ដែលពេញនិយមនៅកម្ពុជាច្រៀងរាំលេងកម្សាន្តជាមួយបងប្អូនខ្មែរនៅទីនោះបន្ថែមពីលើបទចម្រៀងប្រជាប្រិយខ្មែរនោះ ។
អ្នកជំនួញល្បីល្បាញ និងជាអតីតសិល្បករលោកឧកញ៉ា ឡេង ណាវ៉ាត្រា បានបញ្ជាក់បន្ថែមថាការចេញដំណើររបស់សិល្បកលើកនេះគឺជាកម្មវិធីសប្បុរសធម៌ និងដើម្បីអបអរពិធីបុណ្យចូលឆ្នាំថ្មីប្រពៃណីជាតិខ្មែរ ។
លោកថា ការធ្វើកម្មវិធីនៅប្រទេសកូរ៉េគឺត្រូវរើសយកថ្ងៃសៅរ៍ ទី២០ ខែមេសានេះ ដើម្បីឲ្យប្រជាជនខ្មែររស់នៅទីនោះ បានសប្បាយក្នុងថ្ងៃឈប់សម្រាក បើទោះបីជាពិធីបុណ្យចូលឆ្នាំថ្មីខ្មែរយើងហួសពេលបន្តិចក្តី ។
លោកបញ្ជាក់ថា បន្ថែមពីលើការផ្សព្វផ្សាយគម្រោងបុរីឡេងណាវ៉ាត្រា វាក៏ជាឱកាសពិសេសស្វែងរកមូនិធិមួយជួយដល់មន្ទីរពេទ្យគន្ធបុប្ផា គឺបន្តជួយក្រោយពីលោកធ្លាប់បានបរិច្ចាកថវិកា កន្លងមកជាហូរហែ ។
លោកថា ការជាការរួបរួមសាមគ្គីជួយគ្នាដោយទឹកចិត្តតាមលទ្ធភាព ហើយការចូលរួមទស្សនារាំលេងកម្សាន្តនេះមិនគិតថវិកាអ្វីនោះទេ គឺចូលរួមដោយសេរី ។
លោកបន្ថែមថា ដោយសារទីតាំងនៅទីនោះ មានអំណោយផលស្រាប់ លោកក៏មានគំនិតបង្កើតកម្មវិធីរាំវង់មួយនៅពីខាងមុខឆាក ដើម្បីឲ្យប្រជាពលរដ្ឋខ្មែររស់នៅទីនោះ បានរាំលេងកម្សាន្តសប្បាយ និងបង្កើតជារូបភាពថ្មីប្លែកសម្រាប់ជាការចងចាំមួយរបស់ប្រជាជនខ្មែរគ្រប់រូបផងដែរ ។
គួរបញ្ជាក់ដែរថា តារាចម្រៀងដែលចូលរួមនៅក្នុងព្រឹត្តិការណ៍នោះរួមមាន កញ្ញា ឡូរ៉ាម៉ម លោក ខេម កញ្ញា បាន មុន្នីលក្ខណ៍ កញ្ញាយូរី លោក B mo សមាជិកក្រុមKlap Ya Hand លោក វុទ្ធា លោក Tempo Tris លោក ចន ចាន់តារា លោកប៉ែន ចំរ៉ុង លោក ចាន់ សម័យ ជាដើម ៕ វឌ្ឍនា
