សមត្ថកិច្ចខណ្ឌដូនពេញឃាត់ខ្លួនជនសង្ស័យម្នាក់ពីបទ ក្លែងក្លាយឯកសណ្ឋាន នគរបាលជាតិ និងស្លាកនគរបាល

ភ្នំពេញ ៖ សមត្ថកិច្ចប៉ុស្តិ៍នគរបាលរដ្ឋបាលជ័យជំនះ នៃអធិការដ្ឋាននគរបាល ខណ្ឌដូនពេញ ឃាត់ខ្លួនជនសង្ស័យម្នាក់ កាលពីម៉ោង៩និង៣០នាទីយប់ នៅចំណុចផ្លូវព្រះនរោត្តម កែងផ្លូវលេខ១៥៤ ភូមិ៧ សង្កាត់ជ័យជំនះ ខណ្ឌដូនពេញ រាជធានីភ្នំពេញ កាលពីថ្ងៃសៅរ៍ ៨រោច ខែចេត្រ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី២៧ ខែមេសា ឆ្នាំ២០១៩ ពីបទក្លែងបន្លំ (ប្រើប្រាស់ឯកសណ្ឋាននគរបាលជាតិ និងប្រើប្រាស់ស្លាកលេខម៉ូតូនគរបាលក្លែងក្លាយ)។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនមាន ឈ្មោះ ប្រាក់ ច័ន្ទដារាវង្ស អាយុ២៥ឆ្នាំ មុខរបរនឹងស្នាក់នៅមិនពិតប្រាកដ។ វត្ថុតាងចាប់យកបាន រួមមាន ៖ ឯកសណ្ឋាននគរបាលជាតិពណ៌ទឹកដោះគោមាន ខោចំនួន១ អាវចំនួន១, សក្តិមួយគូ, សញ្ញាសឹង្ហ១ និង ម៉ូតូ១គ្រឿងម៉ាក ZOOMER X ពណ៌បៃតងបិទស្កុត ប៉ារ៉ាស្លាកលេខ ន ប 1 4652 (ក្លែងក្លាយ) លេខតួ 5105847 លេខម៉ាស៊ីន 0105847 ។

យោងតាមរបាយការណ៍សមត្ថកិច្ចបានបញ្ជាក់ថា មុនពេលកើតហេតុថ្ងៃទី២៧ ខែមេសា ឆ្នាំ២០១៩ ម៉ោង២រសៀល ជនសង្ស័យ ដែលជាសន្តិសុខឯកជនបានទៅយាមនៅហាងបបរមួយកន្លែង នៅម្ដុំផ្សារដើមគ ដោយស្លៀកពាក់ឯកសណ្ឋានជាសន្តិសុខ ពណ៌ខ្មៅលុះដល់៨យប់ ចប់ម៉ោងការងារបានដូរឯកសណ្ឋានសន្តិសុខចេញ ហើយយកឯកសណ្ឋាននគរបាលជាតិ (ពណ៌ទឹកដោះគោ) ដែលដាក់ក្រោមកែបម៉ូតូ ទិញនៅផ្សារទឹកថ្លា ខោ១ អាវ១ តម្លៃ១០ដុល្លារ សក្តិ១គូតម្លៃ៣ដុល្លារ ស្លាកឈ្មោះតម្លៃ៥ដុល្លារ ពេលដូរឯកសណ្ឋាននគរបាលជាតិរួចហើយ ក៏បានជិះម៉ូតូដើរលេងមួយសន្ទុះមកដល់ចំណុចផ្លូវព្រះនរោត្តមកែងផ្លូវលេខ១៥៤ ភូមិ៧ សង្កាត់ជ័យជំនះ ខណ្ឌដូនពេញ ក៏ត្រូវបានកម្លាំងល្បាតប៉ុស្តិ៍នគរបាលរដ្ឋបាលជ័យជំនះឃើញ ដោយមានការសង្ស័យបានហៅត្រួតពិនិត្យ ទើបដឹងថា ជនសង្ស័យមិនមែនជានគរបាលជាតិ ក៏ឃាត់ខ្លួន រួមជាមួយម៉ូតូ១គ្រឿងម៉ាក ZOOMER X ពណ៌ប៉ារ៉ាស្លាកលេខ នប14652(ក្លែងក្លាយ) យកមកសាកសួរនៅប៉ុស្តិ៍នគរបាលរដ្ឋបាលជ័យជំនះ។

បច្ចុប្បន្នជនសង្ស័យត្រូវបានសមត្ថកិច្ចសួរនាំ ដើម្បីកសាងសំណុំរឿងបញ្ជូនទៅសាលាដំបូងចាត់ការបន្តតាមនីតិវិធី ៕ ជ្រោយពេជ្រ