សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ដោយសារមើលឃើញ ពីផលលំបាកក្នុងការធ្វើដំណើររបស់បងប្អូនប្រជាពលរដ្ឋ នៅផ្លូវលំមួយខ្សែ ដែលមានប្រវែង២គីឡូម៉ែត្រ ក្នុងភូមិបឹងរ៉ៃខាងជើង ស្ថិតក្នុងឃុំក្រោលគោ ស្រុកស្វាយជ្រំ លោកមេឃុំ ក៏ដូចជាមន្ត្រីពាក់ពន្ធ័ និងមានការសម្របសម្រួល ពីប្រធានក្រុមការងារចុះជួយឃុំ លោក សូសូចន្ទ័ បានឧបត្ថមជាថវិកា ផ្ដល់គ្រឿងចក្រ ក្នុងការឈូសឆាយផ្លូវ ងាយស្រួលក្នុងការធ្វើដំណើរឆ្លងកាត់ ។
ជាក់ស្ដែងនៅព្រឹកថ្ងៃទី១ ខែឧសភា ឆ្នាំ២០១៩ លោក ភោគ វណ្ណថន មេឃុំក្រោលគោ ស្រុកស្វាយជ្រំ បានឲ្យដឹងថា លោកសូមថ្លែងអំណរគុណដល់លោកប្រធាន ក្រុមការងារចុះជួយឃុំ ដែលតែងតែគិតគូរសុខទុក្ខ ដល់បងប្អូនប្រជាពលរដ្ឋ មានទីលំនៅក្នុងផ្លូវលំ ឃុំក្រោលគោទាំងមូល ដែលបានបរិច្ចាគថវិកាផ្ទាល់ខ្លួន ដល់បងប្អូនប្រជាពលរដ្ឋក្រីក្រខ្វះខាតមានជំងឺ និងទទួលមរណភាពក៏ដូចជាការកសាងផ្លូវជាច្រើនខ្សែ និងបានរៀបចំកម្មវិធីផ្សេងៗ ក្នុងភូមិឲ្យមានភាពសប្បាយរីករាយ ពិសេសនាឱកាសបុណ្យចូលឆ្នាំប្រពៃណីខ្មែរពេលថ្មីៗកន្លងមក ។
លោកបន្តថា នេះជាសមិទ្ធផលថ្មីមួយទៀត នៅក្នុងមូលដ្ឋានភូមិបឹងរ៉ៃខាងជើង ដែលផ្លូវមួយខ្សែប្រវែង២គីឡូម៉ែត្រ ត្រូវបានយកគ្រឿងចក្រមកឈូសឆាយនាពេលនេះផងដែរ ។
លោកបន្ថែមទៀតថា ហើយនេះ ក៏សបញ្ជាក់ពីការយកចិត្តទុកដាក់របស់អាជ្ញាធរមូលដ្ឋាន ក្នុងការចូលរួម និងបម្រើផលប្រយោជន៍ ជូនប្រជាពលរដ្ឋ ដែលកើតមកពីសុខសន្តិភាពក្រោមការដឹកនាំដ៏ឆ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា និងធ្វើឲ្យហេដ្ឋារចនាសម្ព័ន្ធផ្លូវទឹក ស្ពាន ប្រឡាយ រហូតដល់ទីជនបទមានការរីកចម្រើន លើគ្រប់វិស័យ ពិសេសវិស័យអប់រំ និងវិស័យសុខាភិបាលផងដែរ ។
ចំណែកប្រជាពលរដ្ឋរស់នៅភូមិបឹងរ៉ៃខាងជើង ក៏ដូចជារស់ក្នុងឃុំក្រោលគោទាំងមូល ក៏មានការសប្បាយរីករាយយ៉ាងខ្លាំង ខណៈឃើញខាងអាជ្ញាធរ និងលោកប្រធានក្រុមការងារចុះជួយឃុំ និងសហការី ដែលជានិច្ចកាល តែងតែយកចិត្តទុកដាក់ រាល់បញ្ហារបស់បងប្អូន មិនតែប៉ុណ្ណោះក៏បានជួសជុលផ្លូវ មួយខ្សែនេះ ឲ្យមានការងាយស្រួលក្នុងការធ្វើដំណើរផងដែរ ៕ យឹមសុថាន
